دستانی بہ بَندئے تہ کر چمانی بہ بندئے

دستانی بہ بَندئے تہ کر چمانی بہ بندئے 
کوھانی زراب ءَ چہ آرام ءَ نہ نند ئے

ماتیں وتن ءِ ننگ ءُ میار ءِ مِڑ ءُ جنگءَ 
تیرانی دْرداں دُزّتہ جانی ءَ نہ گِند ئے

جمھیرءِاُرش تیرءِشلان گوں نہ بہ دارگ 
دَؤرگوستہ کہ تو ساھگءَزھمانی بہ نندئے

ھکانی تلب جرمے نہ اِنت اِزتیں نپس ءِ 
مئے اِزّت ءَ نپسءِ کَشتگ آسان نہ گِندئے

اے ھاک مئے ننگریں کوْم ءِ گِسءُگوراِنت 
اے ھاک ءَ پہ ما ٹاہ جتگ شکلّیں زِند ءِ

لاشانی سرءَگوست کن ئے بیا،بلے بِشُکن 
ساہءَگوں مئےدل بَستہ بزان ساہ تئی جندءِ

سر ننگریں بیرانی نہ بیت جھل تئی دیم ءَ 
من زگریں نصیراں بلے اوبادگاں رند ءِ

گل خان نصیر

پاد دروھنت ترا ارساں گوں راھاں شود ئے

پاد دروھنت ترا ارساں گوں راھاں شود ئے 
باریں چنت روچ تو امروز ءِ تماھاں شودئے

ماھکانی وَ وتی ساھگ ءَ اوشتات نہ کنت 
ماہ ءِ شوھاز ءَ کُجاں تنگیں چاھاں شودئے

اے تسلاہ ءَ پہ باندات ءَ ترا کس نہ دنت 
تو دلءَباریں کئی اوستانی سباھاں شودئے

لنٹ ھوشامی انت تئی ارس نہ داراَنت چماں
تو وتی دامن ءَ دار ئے مئے نگاھاں شود ئے

زند چار روچی بھارے کہ شپےسھب نہ کنت 
دیمءِروچاں پہ زرئے گوستگیں ماھاں شودئے

تئی بھشت دروشمیں دامن کدی بےھال نہ بیت 
میر نہ گریو ئے دل ءِ دُراھیں گناھاں شودئے

میر عمر میر

ئید ( عید ) ءِ نام ءَ

ئید ( عید ) ءِ نام ءَ

هـونی ئیں ئـیـد و هـونی ئیں زند ءَ

تـرا مـبـارک بات ، یا مـنی جـنـد ءَ

سُبره ءَ ئـیـد ءِ ارس و هون پُرّ انت

لاش شهیدانی ، کـپـتـه هــر هـَـنـد ءَ

چورهی ارساں شیوگ انت هر جاه

ستکگ انت ماتاں ، داگ پـرزنـد ءَ

هم جنوزام لک،دل هزار داگ انت

هـم گهاراں چـه ، گریوگ ءَ ژند ءَ

تل تلیں جوناں ، تام مئیار انت بار

یا هُدا سوب دئے ،راج ءِ دورگندءَ

اے هـدا ! زلم ءِ تو پروش سانکل

وت بکن درمان ، ٹـپـاں دلـبـنـد ءَ

بندیاں دئے سگّ ،دل پَریش اوپار

نوک نهالاں زانت،تں گِرنت ونده

گوئشت پیرءَ شپ : تهلءِ آسر وَش

بنت درمان ٹپ ، آجویی ءِ رنـد ءَ

کریم بلوچ - تــَـهـــل

25.06.2017

ئید(عید)ے آتک !

ئید(عید)ے آتک !

پر مهرین و پر مزائین سنگتان !

ئید مردمانی شاده و دلوشیانی روچ انت ، هما روچ انت که مردمانی چماں ، شاده ءِ ارس برشک انت و دل بود زوریت و گرک جنت .

ئید هما روچ انت که مراداں پیلو بنت . ئید مردم ءِ دلاں نزیک ءَ کنت و مردمانی هم سَنّتی و دلپهکی ءَ گیش کنت .

ئید هما روچ انت که گم و اندوه ءِ آس توسگ بنت و مهر و دوستی ءِ کلو ، هر هَند ءَ جار ءَ جنگ بیت  .

ئید هما روچ انت که مردماں درد و ڈکاں شموشنت و نوک باهند و چکانی گد و پُچ نوک بنت و دیماں روشن و دلاں پُلّ انت .

***

بلے باز بژنی گپے و دیریں وهدے انت که بلوچستان ءِ هر هند و دمگ ، جنگانی آس و بمب و بمبگواریانی آس روک انت و مردمانی هک لوٹیانی جواب لٹ و کٹ و کشت و کوش انت و .... 

هزارانی هساب ءَ ورنا و راجی جهدکار گار بیگواه کنگ بوتگ انت . لوگ په لوگ ماتانی نگیگی ، چکانی ارس ریچیں چماں ، جنین آدمانی پر سوزیں نارگ و هدای ءِ درگاه ءَ چیهانٹ و چیهالاں سرا زرتگ ؛ بامردیں شهیدانی تل تلیں لاشاں هرجاه تچک انت و هر روچ و هر دمان بلوچ ورنا و نوک ورنایاں دزگ و گار و بیگواه کنئگ بنت ، هزاراں کس سیاهیں کیز و بنداں ، داب دابیں جگر سندیں ازاباں کشئگ و سَگّگ انت و چه دگه نیمگے بژنی هبر ایش انت که راجانی میان استمانی اداره و سازماناں چپ انت ، بلوچانی کشت و کوشانی باره ءَ کمتر هالتاک و شنگ جاهے هبر شنگ بنت و بلوچ جهدکار بازیں گروپاں بهر انت ، بے ایشی که یکیں جبهه ءَ هور و همراه ببنت . اے پهک سوب بوتگ انت انت که بلوچ دژمناں وتی زوراکی ءَ گروناک ببنت و لوٹنت که بلوچ ءَ ماں گنجیں بلوچستان ِ گلزمین ءَ گار و بیگواه بکن انت ... بلے دلجماں که آهانی اے بدیں واهگ ، چَپ بیت و بلوچستان بلوچ بامردیں سرمچار و هک لوٹانی جهدانی برکت ءَ آزات و آجو بیت ...

دزبندی چه گلیں سنگتاں همیش انت که ئید ءِ نام ءَ بلوچ راج ءِ شهید و بیگواهیں سنگتانی لوگ ءَ برو انت و آهانی شهیدانی روکیں آس ءَ گوں یاتگیری په توسگ مه هِلّنت .  گوں آهانی کمک و مدت ءَ وتی راجی زمه واری ءَ پیلوبکن انت . تاں آهاں بزان انت که کس آهانی شهید و بیگواهاں نشموشتگ و نه شموشیت . و دور نهنت هما روچ که شهیدانی واهگاں پیلو و بلوچستان آزات و آجو به بیت !

ایشی ءَ ما پیکه بزانوں و به ماروں که شهیداں و بندی و بیگواهانی مات ، و گهار و مردم مئی هم چو مات ، گهار و مردم  انت و آهان ءَ هم دیدگاں دارگ لوٹیت . پر آهاں وتی وس ءَ چیزے به بریں ، آهانی چک و مردمانی کمک مئی راجی جهد ءِ یک زمهے  !

سبز و سوبیں بات بلوچ راج !

آزات و آبات بات گنجیں گلزمین بلوچستان !

کریم بلوچ - تهل 

25/06/2017

دستونک

تو که مهر ءِ بادشاه ئے ، دلبر اوں ما بندگاں

سد بهشت ءَ پُلتگ دل ، تئی چه ناز و کندگاں

سار ءِ سودا مهر ءِ دود انت، مهر ءِ بازار ءَ بیا

چه سرءَ سرگوئستگ اں ما ،تئی په نازیں چنڈگاں

تئی په لنٹاں برپکیناں ، دروشم ات په هوش بریں

گوئشته گالاں پر زهیریں ، مهر ءِ گالاں بندگاں

پهک جهان ءِ هانی ئے تو ،هم تو مهناز سمی هم 

شیرن ئے سدو ومهگنج ، توئے ساه په زندگاں

شپ چه گیب ءَ آتک هیالے سجده سَد هور کت ترا

چم کنجل آسکلی ترڈ ، وزبت ات نئے مَندگاں

بیا که پر تو هستیاں ما ، ما په ٹهلے باهتگ

تهل ءِ تام ءَ شهد بکن تو ، گوں وتی بچکندگاں

کریم بلوچ - تهل

20.07.2017

چــــاربــَـنـــد

چــــاربــَـنـــد

دل کتگ تو هَـنـد ، من وا بے هَنداں
تـئی چه نازان انت وتی دل ءَ کنداں

پهک جهان تئی بات دروشمءِهَیران
مهر تئی بیرک ، راج اِت پهربنداں

کریم بلوچ - تهل

کـُـٹـتـک روچگ ، نه کُت اِت هونواری

یا هــُـدا تـئی نـــام ، چـیـنـچـو بـاپــاری

هَک گِریں راجانی کشت و هون چینچو

یا که دیــن ءِ نام ، چـیـنـچـو سِل کاری

کریم بلوچ - تهل

من زندگون بلی پنجاپی و گجر دی دی منی پوستا جننت

من زندگون بلی پنجاپی و گجر دی دی منی پوستا جننتـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

عبدالستار پردلی

شنت که بابا آدمی زهگ په زالی هاترا وتا گون مڑتنت ، پسش بهشتا په گله ئی دانی بها کرت ، چو که پسی ناپرمانی و آرامین زندی نبرازگ و گلام مانگ و نا تپاکی آیوکا گڈی بوت که امی کسمتا رست ، اگه چوش مبوتین گڈان چاکر و گهرام په جن وزانی هری هاترا وترا سالانی سال نه ڈلیتنت و چینکس ورنا بری ناتپاکییا اجلی لنکه بوتنت .شه بیوسییا ، یکی امی کلانچییا په دک و نیمونی شه اما گپت و کراچی یی جوڑی کرت ، همی بلوچستانی دریابی دامونا ، دگری ودی بوت و گمبارانا شه اما زیت و اما هیز هیز چارتن ، اما دژمنا گون آنکس نه مڑتن که وتا گون دست و زینچک بوتن ، دشمن امی نزوریی ٹیکا ودی کرت و اما را باٹ دات که ته سرداری وی ، ته میرسیب وی ، ته نواب سیب یی ، چانٹوکی ماجب مئی کماشا را مکرر کرت و مئی کوپه شائیا نشت و اما گون کسانین نیادی بها بوته وسامراجی گلام و کنیز بوتن ، سامراج امی مکئین بلوچستانا گون کیشکانی کشگا بهر و چانٹ کت .
استئمار والا ، اما را نا زانت ساتت ، سکولانی درا امی پسگانی دیما بست و کرار کرار دگرانا به کارنده یی ناما آورت وامی لوگا آوانا سپارت و کم کم امارا شه هساسین جاگهان ٹگلینت و دورا چگل دات ، منی گوادرا ،درئیانا ساپکن که مپت دات و پریشی هم کنائت نکرت ، گنجین گوادرا زردوکین گودر ، یانی چاینا وتا گون شریک کرت که نین ایدنا من سری پنجاپیان ، گون چاینا هم ڈوگ وارتون .
منی مسترین بدکسمتی ایشنت که اما را مهکمین تپاکی نه انت ، یکی شه امی سرداران پنجاپی سر وزیری میلانکییا کبول کرت و گون نواز شریپی ڈرائیور و باڈی گارڈ بوهگا ، بلوچانی پونزا برت ، دگری هم اکبر بگثی یی هونا شموشت و راهیل شریپی دستانی سرا آپ ریهت ، وتی ماتین وتنا چه شموشکار بوت و جار کرت که په کشمیری آجو کنگا بلوچ لشکری سربراهییا کنت.
چاینا شه برزگا گون مدرنین تکنالوجیی کار مرز کنگا ، چوگولی داریت و بلوچ سرمچارانی هلاپی رپوٹانا ، آی اس آی یا دییگا انت و کوپگ به کوپگ بلوچانی هلاپا جهد کنان انت و گون بلوچ نبیرگ کشییا گلایش انت ، نین پنجاپ دو گامی سرا مان بلوچستان چیک پسٹ جوڑ کرتگیت مگه سری ایشی بلوچ سرمچارانی جهد شول نبوته بلکین ترندتر بوت ، بلوچ گون دشمنا دیم په دیم مڑگا انت مگه هستنت کسی که به بلوچی ناما شه پشتا بلوچا را ریپگ جنت که ایش بلوچا را تورینیت .
دشمن تلوسیت که بلوچا را بلوک ، بلوک بکنت تا که بتوانیت په وار یکی لاپا را بدریت ، اگه امی کماش ای بلوکانا هور بکننت و ای لشکری سرپاسرا شرییا بدارنت گڈان بلوچ رسترین دشمن نتوانت که وترا گون بلوچان دیم په دیم بکنت و اگه هلمه بدنت امی سرمچار رپوزی پروشنت 
گجر دژمن ، زی بلوچ تنکییا هرمزی ناما کرتنت ، گمبارانا هرمزگانی سوبه ئا لچینتنت و مرچی چمان په چاهبهاری جانا سهور کرتگنت ، زی به چاهبهاری آزاتین بازاری ناما سوداگریی بنجاهی جوِڑ کرت بلین گتسمی هم بلوچا را نرست که پادا سری بیلیت و دستپروشی بکنت ، چه جاییکه پیه پرینیت ، مگه په پارسییان ڈگار مپت دات و بانکیین وام گون دگه وڑی تسهیلاتان پراوان بریبیر کرت ، پریشی هم بس نکرت ، وخت و نا وخت امی آ ورنای که بلوچیین اهساسی داشت شپ و نیما سریش به چکی چیریش ، زابلییانی زریه کرت و نین گجر دوهمی گاماچست کنان انت .
چاهبهار نین دولک ایشک و آشکا نندوک داریت و شه ایشی که کم کم ای بندری هیسیت برز روت ؛گجر پلان داریت که ۱۲لک گیر بلوچا بیاریت و جهمنند بکنت وکرار کرار چاهبهاری بلوچیگین پجارا گاربکنت و همی زوتان به زریین واکی کارندهانی ناما ، نزینک سی هزارا، جهمنند کرت و پکربکن که اگه ایشانی کهول پنچ مردمی بنت همی نون گیر بلوچ و بلوچ بریبیر بوتگنت ، بلوچ همی نون به چاهبهار په پٹی آپ به کربلای پٹاجینت که وتی گٹا تر بکننت بلین په ای نوک آمدان چمگی آپ به شیشگانی تها بریبیر بیت .
من بلوچ که ۹۲۵و سالا گون پورتگیزین دریابی دزان ، مڑتون و پونزیش به هاکان موشتون وگجر سوب وبیگاها چیدگیش په سر چم به چاهبهار، درابی کئرا گندنت ، مگه من مرچی چه کارو بوتون و گجر منا لگت دیینت و منی بدلا آ پیسله کننت .
هو بلوچ ! اگه وتی گڈا شرییا مه ساتی کبول بکن هما وڑا که تئی تنکییا شه ته گپتنت و هرمزی ناما کرتنت ، تهی دریابا گپتنت و اومانی ناماکرتنت ، تهی ایرآپ ، تهی واش ، تهی گوو، تهی گنداوگ ، تهی گه تهی شستون و دگه نامانا بدلینتنت ، باندا تهی دایم بهارین چاهبهاری ناما هم به گجام آیت الله ناما کننت ، ته یی بلوچی زرد چون زیریت که چیٹکین کوٹ وشلواری گوئرا کنی و به بسیج واشائریین سپاه ناماچم جال گردی ، مشموشی که هملی پشپدی ، ته داده یی داشتگی ، ۲۲ سالگین رهیم زردکوهی شه وتی ساها په تهی بودگاریا گوست ، ڈاکٹر رهمت په ته وترا ندرکرت ، کی توانت که یاکوب مهرنهادابیهوش بکنت ، مالک ریکی هونا مشموشن که ای سرین مرد په تهی پجارا گڈیین ترمپ هونا دات .
منی پاگ ! لوگ دشمنی سرین پروشین پسو ، آیوکا ایشنت که اگه منی کرمانی ، منی گمبارانی ، منی زابلی ، منی چاهبهاری ، منی ایرآپی ، منی مکرانی ، منی نیمروزی ، منی کوه سلیمانی وترا بلوچ زانتنت و فدرالیزم وخودمختاریی پدا یل داتنت و اجوبلوچستانی پربالگین ریزا سک لچتنت واما مچین په بلوچیزما سوهتن و تپاک کرتن و اگه گجر بلوچی را مان ایرآپ درنجیت و منا تورینت و اگه مان آواران و ماشکیل بلوچی بیگواه بوت و من هیال کرتون که پنجاپی منی باسکا گڈت و اگه مان مکران بلوچ لوگی سوهت و من مان نیمروز پکر کرتون که منی کلات بن گپت ، گڈان منا یکین بیت که شدینگو گجر و چوهدری منا مشت ولگت جت نکننت ، پکت و پکت آجو بلوچستانی بیرکی چیری سارتین سایگنت که مئی ٹپانی سری ملم بیت و بس .منا شه درملک و هاس یوروپی نندوکین بلوچان دزبندی انت که بلوچیگین پاگا پهک و برز بساتن و چم براه مبین که واجه کدگ الله نزر ، هیربیار ، براهمداغ ، مهران ودگه سرین کماش امی توارا چست بکننت یا که زهم بجننت ، بلوچستان آیوکا آوانی پجار و تشخس نه انت بلکین من و ته هم چانٹوکی شریکن ، امی وزیپه هم انت که هرکه په وسا بری راها گام بزورن

شھید اَبدُلسلام ( عبدالسلام )

من پَرے ھاتر ءَ تپنگ چِست کُرت من ھمک نیمگ ءَ دیست کہ آجوئی ءِ جنگ ءِ جار جَنگ بوھگ ءَ ایں من دیست کہ ھما گونڈوانی تہ ءَ ھمے سَسّا ودی بوھوان اِنت آ پِگر ڈاکٹر ءِ پِگر اِنت آ چیئرمین ءِ رنگ ءَ روگ ءَ ایں آ ھما وارس ءِ کہ آئی مشکے ءِ لوگانی جاہ ءَ وتی لوگ کسانیں بالاد ءَ کوہ کُرت آں من ءَ ھما پِگر ءَ سکین دات من وتی کسان ءِ بالاد نہ چار اِت ءُ وارس ءِ پِگر زُرت دیم پہ مات کوہاں اے ھم اَھد کُرتگ اَت کہ گڈی تیر ءَ م

یڑان باں 

 شھید اَبدُلسلام

مـیر_هوت_هَـمّـــل ءُ پرتگالیانی جنگ

مـیر_هوت_هَـمّـــل ءُ پرتگالیانی جنگ⚔

*میر ھمل جیھِند یا میر ھمــل.کلمتی کے بوتگ؟؟؟*

*میر ھمل کلمتیءُ پرتگالیانی جنگ کدیءُ چون بوتگ؟؟*

*پرتگالی portugese ماں میاں رودراتکی ملکانی توکءَ کدی آتکگ انت؟؟*

اے بابتءَ یک ندکارےءَ چش نبشتہ کرتگ کہ پرتگالیاں ماں بھرینءَ (عَراد) ءِ کلاتthe arad fort1559 ءَ گپتگءُ رندءَ ھمے کلاتءَ را ۱۶۰۲ ءَ اُومانی گرنت گش انت کہ اُومانیانی لشکرءِ کمانداد بلوچ بوتگ انت.

آھاں تاں بازیں مدتےءَ کلاتءِ چارءُ دلگوش کتگ اے زانگ نہ بیت کہ آ بلوچ کئے ءُ کجءِ بوتگ؟ البتءَ ھما سدیءَ تنزانیہءِ سرءَ اُرش کنوکیں بلوچ شریءِ سرءَ زانگ بیت کہ شھداد چوٹا بوتگ کہ گوں چل گچ اِتگیں زھم جنءِ ھمراھیءَ ممباسہءِ سرءَ اُرش کنتءُ گیپت ئے اے گپ راستءُ.پکا انت.

چہ ایشیءَ مردم المیءَ گشت کنت کہ اِراد ءِ کلات ءِ گرگءِ ساک پرتگالیانی ماں رودراتکی دمگانی سرءَ ارش کنگءُ آھگءِ بُنگیجی سال زانگ بیت.

اے گپ دلگوش کرزیت کہ پرتگالیاں نہ ایوکءَ میان رودراتکءُ اے دگہ ھمساھگیں ملکانی سرءَ ھم.اُرش کتگ بلکیں آھاں سرجمیں دریا ھم.پشتءَ.کَش اِتگ ءَ باز تازی. پارسی بلوچ ءُ دگہ سوداگرانی بوجیگ گوں مالاں برتگ انت.

وھد گواہءُ شاید انت کہ پرتگالیاں ۱۵۸۱ ءَ.پسنی ءُ گوادرءِ ھلکءُ میتگ مانداشتگ انت بلے چہ ھمیشانی بازیں ناشریں کارزوالیءُ سِلکاریانی سببءَ بلوچستانءِ تیاب دپانی میتگءُ بازارانی مستر ءُ سردار میرھمل ءِ جیھند گوں آھاں جنگ کنگ ءِ نیتءَ کنت.
 میر ھمل کلمتی بلوچانی جوڑ کتگیں باز بوجیگ زوریت یک مزنیں جنگی بندوبستے اڑ کنت ءُ یک مزنیں بوجیگے کہ آئیءِ نام *شاگ* بیت شہ ایشانی سرءَ ھمل گوں پرتگالیاں جنگ کنت
پرتگالی ھملءِ دیمءَ ھمک رندءَپروش ورنت ءُ آھانی بازیں بوجیگءُ ٹوپے ھمل ءِ دستءَ کیت
انچوش گش انت کہ ماں گنجیں گوادر *(گْوات+در)* ءَ پہ یاتگارءِ واستءَ ھمے نزیکیں وھدءَ.پہ درور ایر بوتگ انت
 پُرتگالی شہ ھملءِ دستءَ.ھمک رندءِ پروش ورگءَ چہ رند ماں بلوچستانءِ تیاب دپاں یل کن اَنت ءُ رو اَنت گُڑا اے دمگ ایمنیءِ سارتیں گوات تالان بیت مھلوکات پدءَ روت پہ وت لوگءُ جاگہ بندیت ءُ جھمنند بیت سوداگر ھم.سوداگریءَ اَدن.مسر بسرہ.اپریکی ایران بندناں رو آ کنت ءُ اے دراھیں تیاب دپانی چارءَ دلگوش ءَ می ھمل کنت
 *تاں بمبور ءَ.ھدءِ بوشھرءِ بندرءَ*

*کرتگ اَت آزات آ مزن نامیں مھترءَ*

*ھملءِ جیھند ءَ گوں لانکءِ المــاسـیں زھبرءَ*

انچوش گش انت کہ لھتے سالانی ایمنیءَ چہ پد یک روچے شمبے ءِ روچءَ مسلمانی ماہءَ شانزدہ رمسءَ ھمل گوں وتی سنگت سھرابءَ دگہ لھتے مردماں ماں دریاءَ سیلءَ روت.
آ ماں دریاءَ سیل کنان بنت کہ آھانی بوجیگ ءَ ماں اومانءِ گورء َ‍ توپان گیپتءُ توپان بوجیگءَ.بمباسہ ءِ نزیکءَ بارت چوشکہ پرتگالی ساریءَ ھملءِ سرءَ زھر بنت.
اے روچءَ آھانءَ ودار ءَ داتگ ات آ گوں چار آپی گرابءَ کاینت شاگءَ چپءُ چاگردءَ.گرنت ءَ ایشاں توار پر جن اَنت کہ شمارا دزگیر کنیں بلے اے وتی دزگیر کنگءَ نہ منّ اَنت پہ جنگءَ ساجو بنت.
انچوش گش انت کہ پرتگالی ھملءَ جا کار انت ءُ مزنیں سلاہءُ مڑاہءُ پیش کش کن انت بلے ھمل ھچ وڑءَ تیار نہ بیت گُڑا پرتگالی جنگ کن انت گوں ھملءَ.
اے جنگءَ ھمل بازیں پرتگالے جنتءُ کُش ایت بلے چش کہ پرتگالی چار بوجیگ مردم بنت ھمل یک بوجیگے بس لھتے سنگت بنت ارداہ اش جنگ نہ بوتگ بلکیں سیلءُ سوادءَ درآتکگ انتءُ سر اِش جنگءَ کپتگ

*شرت هما شرت اِنت کہ همل ء جیهند بستگاں*
*واده ءُ تاریک پہ پدی مرداں اشتگاں*
*مات بزرگیں ماں هیمهی توکے نشتگاں*
*آ جنین چُک ءَ جمبریں ملگور رستگاں*
*شمبے ءِ روچ ءُ بُرج هما شومیں اگرباں*
*شمبے ءے روچ ءُ شانزده ات ماه ءَ بَرکَرار*
*گْوشتگ ات مات ءَ گوں وتی ماهیں چم کُمار*
*شمبے ءُ شانزده سَر مہ شود براتانی گْهار*
*شمبے پہ براتاں شوم اِنت شانزده پہ پِت ءَ*
*شُوم هما روچ اَت کہ همل ءَ شاگے نول کتہ*
*همل ماں شاگ ءَ شاگ ماں سبزیں ساوڑ ءَ*
*دور کنان ات ماں سَر بر ء نیلّبوئیں زِر ءَ*
*تانکہ بمبور ءَ هَد ء بوشهر ءِ بَندر ءَ*
*کرتگ اَت آزات آ مزن نامیں مِهتر ءَ*
*همل ء جیهند گوں لانک ءِ الماسیں زهبر ءَ*
نَرمَزار سالونکیں هزار بیمّیں کُنگر ءَ
 ھمے وڑءَ دو دیمءَ جنگ بیت گُڈ سرءَ.ھملءِ باز مردم جنگ بیت گُڑا گڈ سرءَ ھملءَ دزگیر کن انت پدءَ اومانءَ بر انت بلے لھتے گش ایت کہ ھندوستانءَ بَر انت ھملءَ را شہ اُودءِ برگءَ چہ رند پرتگالیانی ھاکم گش ایت کہ ھمل اَچ مارا سانگ بہ زور گُڑا ترا پھل کن ایں ھمل انکاری بیت شہ اے گپاں لھتے گش ایت کہ ھملءَ.کُش انتءُ آئیءِ گوشتءَ وتی جنین زھگاں دینت کہ آیانی زھگ دلیرءُ بھادر بہ بنت
ھمل ھما بامرد بوتگ کہ وتی نگرھیں جان پہ بلوچ ڈیھءَ بکشاتگ ئے مرچی راجدپترء‍َ ابدمانءُ نمیران انت
*پُرتگالیاں سازتگ مکرے ماں دل ءَ*
*چہ انگلستان ءَ جَم جتگ پوجے اَپسر ءَ*
*هیلہ ءُ مکرے جوڑ کتگ شُومّیں کاپر ءَ*
*چہ وتی ملک ءَ جَه‍ جتگ سِلیں رَستر ءَ*
*جنگی آلات ئِے زُرتگ اَنت منور ءَ*
*پورهیں ماهے تَرّ اِتگ نیلّبومیں زِر ءَ*
*نیّت ئِے ایش اَت کہ گِراں راج ءِ مِهتر ءَ*
*همل ء جیهند ءَ گونا لانک ءِ زرهْبر ءَ*
*چہ دو ءَ یکّے لازم اِنت پَر مائیں نَر ءَ*
*من بلوچے آں ایر اَنت منی تاریک دپترءَ*

*اے ھبر گیر اَنت کَش وتی شاگءِ ننگرءَ*

*اے ھبر اَیب اَنت پہ منی نازاکیں سرءَ*
*اگاں سانگے بِکنت چہ پرنگانی دُختر ءَ*
*اگاں نہ کنت سانگ زِیان کنیں شیر بیمّیں سَر ءَ*
*دیر نہ بیتگ بِـهِکمت ء شاهیں کادر ءَ*
*شمبے ءِ روچ ءُ وهد ء بیگاه ءِ آخر ءَ*
*همل ء جیهند گوں وتی جانشواں در ءَ*
*کَجّ ات ئِے آچار ماں نیلّبومیں زِر ءَ*
*نیّت ءِ سیل ءَ ماں اُمان ءِ کِرّ ءُ گْور ءَ*
*بُرتگ اَت شاگ ءَ داں خاشی کِشور ءَ*
*نِزّ ء بمباسہ برتگ اَت دنگیں مرد وَر ءَ*
*انچو شائین ءَ آرتگ اَت نَکسیں " سوجر " ءَ*
*چار گراب ءَ گوں مرگی چَرّوکیں پر ءَ*
*ڈیکّ بہ داتنت شیر ءَ گوں پرنگی ءِ منور ءَ*
*شاگ ئِے ماں اَنگرّاں چتگ شومّیں کاپر ءَ*
پرتگالیاں بے گْهار ءُ هما بے مادر ءَ
ھرکس شہ وتی ھندءُ دمگءِ نامءَ شہ زانگ بیت
کلمتءِ. ھند چَنڈیءِ نندوک بوتگ ..کلمت ءَ انگت ھم ھملءِ نشانی ھست انت
 میر پنڈوک کلمتی گش ایت کہ ھمل مئے پیروک بوتگ

*سَرسُوج*: ناکو رگام

شنگجاه

خسرو ملازهی سه‌شنبه 9 خرداد 1396 ساعت 07:17