محمد اسحاق _ عطا شات 

پدا فقیرے ءِ بے ساری ءِ پدا کپتگ! 
اے بادشاہ وتی گاری ءِ پدا کپتگ

درآمد کہ ترا عزّت و شرپ بخشیت 
وتی ھما ، کہ تئی واری ءِ پدا کپتگ

اےکپتہ کار نلوٹیت پدا کہ قہر بہ بیت 
غریب پرچیا ، سرداری ءِ پدا کپتگ

خدا مکنت ترا دست ماں دست گوں دگراں 
گُشنت رِند نوں لاشاری ءِ پدا کپتگ

بگند وھدءَکہ زرّ و طلاہ ءِ پوشاکی 
چےدرتہ شال ئےءِ برہ داریءِپدا کپتگ

عطامنءَاے گیابانءِدرچکے سایگ بس 
لوار، چوں منی ھینّاری ءِ پدا کپتگ

شـُـتـنـت

شـُـتـنـت

میر گل خان نصیر

چکه ورنا گار بیت ئنت ، چکه سرپٹاں شت ئنت

دست و بازو چکه پرشتنت ، چکه چم لٹاں شت ئنت

چکدر لوگ و گداناں آس ءِ زراب ءَ  ویڑتگ

چکه ننگانی گـُشاں هالاڑ و هالٹاں شت ئنت

پر تئی ننگ و مئیار ءَ ، او منی ماتی وتن !

چکدر ساه سرگلانی ، ماں گر و گٹاں شت ئنت

چکدر مات و پت و گهارانی چمانی چراگ

تُست ئنت بے رونٹاں و هارانی گوں کرکٹاں شت ئنت

انگته منزل مئے دیر انت جم جَلنت تبد و لوار

گرچه ورنا سرمچاریں روچ و شپ سٹاں شت ئنت

ما ، بلیکه نادری سرمال و چکچین بیتگوں

دُژمن ءِ کهریں سپاه دی ٹپ وتی چٹاں شت ئنت

زرتگیں گاماں مدارت ! سنگتاں سسا کنهت

چک مپروشهت په پدوکاں،مٹ گوں مٹاں شت ئنت

بیرک ءَ چست کرتگیں ، گواتو دیهت برز گوں سهاں

سامراج ءِ ڈل بزانهت زیت مرگهٹاں شت ئنت

هر چی بادا بات ، نیں واتر کنگ پما نه انت

کئول و جوڑ ءَ ، گوں نصیر ءَ کنگراں وٹاں شت ئنت

سنٹرل جیل مَچ . 14 جنوری 1976

         *************

بیل ( بهیل ) و هالاڑ : زر و دریای ءِ آپ ءِ جهل روگ و چست بیگ . « جزر و مد » .

هالٹ : کور ءِ هار ءِ ارشاں .

ویڑگ : سچگ و بیران بیگ .

کرکٹاں : تل تل و هشکیں مت و هاک .

جم جلنت :آس ریچ . آس ءِ زراب . زراب دیاں .

سسا کنهت : هیال کنهت . همت کنهت .

زلم ءِ گرئند و هئور انت ، په سه نهار انت مرچی

زلم ءِ گرئند و هئور انت ، په سه نهار انت مرچی

بیلانی رُمب ماں جنگاں ، چش که مزار انت مرچی

ماتی وتن ءِ په بند  و ، په  سانکلانی  پروشگ

شیر زال و شیریں مرداں ، یک و تیار انت مرچی

آزاتی انت په راجاں ، دادے نه دنتی کس هم

آزاتی ءَ په زهم و ، توپک ءِ توار انت مرچی

بندان ءَ ما پروشوں ، گلامی و ساه ءِ بندان

آجویی ءَ په راج ءِ ، رُمباں هزار انت مرچی

بیا بیا که سرمچاراں کوهاں و شهراں جار جت

زلمیں دُژمن ءِ پئوج ، ٹپاں چه وار انت مرچی

سوچ انت هزار لوگاں ، درنج انت هزار ورنا

سوچان بلوچ ءِ راج هم ، پئوج ءِ کتار انت مرچی

آجوئیانی پهر انت ، دنیای ءِ سرمچاراں

پادا ! په دژمن ءَ تهل ، پروش ءِ گدار انت مرچی

کریم بلوچ - تـَـهــل

11/11/2016