« پهره روتاک » « روزنامه پهره »
ادبیات بلوچ« پهره روتاک » « روزنامه پهره »
ادبیات بلوچتو هدایانی همبل ئے بیلی !
تو هدایانی همبل ئے بیلی !
دستونک
بــــاریـــــن ؟
بــــاریـــــن ؟
روچانی دَنز و پُلگاں
تَـم کُرتگ انت هَیال
بارین کُجام دل ءِ بور
سِستگ ره ءِ کمال
بارین دِلانی کـَشـّــَگ
سرمستی ءِ شمال
بارین مجاں بَنت اندیم
مدام ماه و سال ؟
*
گِیر انت که کاینت انگر
سوچ انت هم دل ءَ
باهینت وهد و سالاں
کم زانتی ءِ گِل ءَ
هُرجیت نازکیں تَب
دَؤرانی مُشکِل ءَ
چَکـّـاس دَؤر ءِ سَکّ انت
گار بیت چو منزل ءَ
*
بارین بوُد زور انت
بَچّاں و سَؤل بنت
راج ءِ گـُلیں ورنا
اِستار ءِ ڈَؤل بنت
گـُوَرماں چو دیم کنز انت
زِرانی چَؤل بنت
پروشنت بَد ءِ کـَلاتاں
یا جُهد ءَ هَؤل بنت؟
*
زندان و بَند زند ءِ
ڈِیه ءَ چه ڈَنّ گوں سوز
شپ انت سیاهیں روچ هم
مَیمے نه جِند ءِ روز
ساز انت گـَم ءِ ترانگ
هم ڈُکّی ءِ سروز
بارین امیت بَنت گـُٹـگیر
نا زانتی ءِ مَروز ؟
*
باور نه بیت که جنگل
لـَوار ءِ آس برؤت
سمین ءِ گار مرادان
گوریچ به بارت سَؤت
مَردانی اِیر مر انت جُهد
وَهد ءِ به بیت مَؤت
پَد ریچ - پـُل بَرانی
بارین کے انت که جَؤت ؟
*
زاناں دست که یک بَنت
پروشنت بَد ءِ کـَلات
کـَد بیت بے وسی هم
هم لَنگـَڑی مه چات
وَشّی و شاده ءِ دَؤر
همسیال ، پهک برات
هَزّام بیت بهارے
آزات راج و شات
*
زاناں مهر پـُلّ بَنت
ٹـِکّ دَنت چو بامسار
شاده گوں رُژن شانت هم
کـُـٹـّـَنــت مئے ودار
پگرانی بَند سِند انت
شهگان بَنت هزار
بیا بیا که آجویی انت
کـُرتگ ترا تَوار !
بیا بیا که آجویی انت
کـُرتگ ترا تَوار !
کریم بلوچ _ تـَهـل
13/04/10
ماسکوا _ اُرُس
دل ءِ هـُـلّ
مـنـی بـیـلی !
