چنت دستونک

             (1)

بال کت انت واهگ دل ءِ بند ،تئى نه مَنٌى ءِ سرا
نیں بَــراں ما وتى مـــراداں ، تَــام پیـــرانى  در ءَ

پیر دوشى زَهرى ءَ شُـت ، ا ِزگـَلیں دیـوان ءَ چه 
چوں به مـَـنٌاں ٹهل و نازاں ، روچ و مــاه ءِ  درور ءَ

بندیانى میر ءِ شیپانک ، چــو که مــلا واز کــَــنت
پندلانی دین و دنیا ، سد کشنت شــیر  و نــــر ءَ

آزمان ءِ بالــى شهبانـز ، دیر گند انت گـوں هـَیال
تولگ انت ٹگیں که دز انت ، وتــى براتانى بــر ءَ

"تهل" ! جهان ، زلم ءِ  زمستا ن  بیـت چو شــپ
سیٹ و ملا ،هور و یک انت ، زنده وار و  جان در ا

                                                              08/07/08

                                   (2)

مـــا وا اســـــتاراں جـــهان ءِ ، په گل ءَ سرشان کتگ
تا وتـــــى راز ءِ دلــــی گــــپ ، مهــلب ءَ درشان کتگ

زنـــد ءِ مـــهر رودیں گـُــلان ءَ ، ماں بـهار ءِ واهــــگاں
تئــــى مـدامی پٹ و پول ءَ، هپتیں ماں ارشاں کتگ

گــل ءِ شــرابیں چم و لنٹاں ،برانزءَ سینگار انت چو پل
شــپ تــهاریں اش کدینتگ ، روچ اش چو زرشان کتگ

همــــتانی بال ءَ سـوار انــت ، آ  که اســتاراں رو انت
وش تـــب و آزاتــیـں راجـاں ، زند گــر شر شان   کتگ  

نود بســـتگ جمبریگ ءَ ، هرکدیـــں نــوکیـــں هَــیال
تـئى چه زیـــب ءَ رنـــگ زرتـگ ، گر که آ هر شان کتگ

"تهل" و شهد ءِ سهل ءِ گپ انت ، اے زمان ءَ ماں جهان
کے پدا زیــمیں دل ءَ پروشت و ،  دو  بر  پَرشاں  کتگ

مَــوت وا کال انت بے بریں و ، زند وا هوشاپ ءِ زمین
بیا پـدا اُمر ءِ  بهار ءَ ، واهــــگاں بــــر شـــان  کتگ

                                                              07/04/08

                                   (3)

مئى دل ءِ آسـاں چارئے ، دوت نیست
کشتگیں گواتانءَ باندات، سوت نیست

هم  زبان کاٹار انت پر ما ، هم که بیم
بیدلانی دشت و گیاب ءَ ، لوت  نیست

زهم ءَ بیت راهے کدیں، په بے وساں
شنگریں آهانى چــات ءَ ، زوت نیست

ڈک و هشکیں بهت ءِ پٹ ءَ مئى کشار
سال و مه گوست انت و آهر روت نیست

"تهل"چوں هینٌارانت سیاهیں ماں شپءَ
تئى جتایی ءِ زهیر  هم ، بوت نیست

                                      07/07/08

                                 (4)

گوستگانى پَـهر ءِ اوشتگ ، اے مزن پهرے نه انت
زنـد ءَ جــنزگ ، راه ءِ بُرٌگ ، بید دگه لــهرے نه انت

گوات کشیت بیت و هست انت،گر مه کشیت نیست گوات
هست جنزے هست نامے ، نام دگه بهرے نه انت

ما دلان ءَ تاں بَلین اوں ســدهــزار مــهر ، لک مراد
بــیت آبــات دپــترے و ، راج دگــه شــهرے نه انت

بے مراد ءِ گوانک و شور انت ،گـَؤش و تـوپان ءِ ردا
نامے چوٹیں،هم نه وشیں،هچ دگه زهرے نه انت

ما چو گواڑگ کت دل ءَ هون ،مـــهر ءِ دنــیاى ءِ پدا
هست ما اوں داں که مهر انت مهر دگه تهرے نه انت

جٌـــنز بــُنگیج انت زمان ءِ ، جُنز راهانـــى شـوهاز
لیه و اوشتانى پروشـــگ،په دگه چـــهرے نه انت

"تهل"ءَ جنزیت بیت شیرکن ، گر مه جنزیت بیت گار
هر دوئیناں وتسیاد انت ،کـد کـدیں زهـرے نه انت 

                                                          کریم بلوچ _ تهل