دل ءِ هـُـلّ

دل ءِ هـُـلّ

( شهیدانی یات )

آسیگیں دل اوں 

ایرجیگ کن 

مهرانی تماه 

        زند داشتگ

کاینت هرکدیں هُلاں تئی 

ساه ءَ گـَـٹ چن انت 

    هئو هنبو

بنداں دست تئی درگاه ءَ

ایرجی تو بکن ماه و سال

گورگنداں منا پیلاشتگ

،

بلّ تو هانل ءِ زهیران ءَ

کاینت پُل گـُدیں دیوان ءَ

مِسک و انبراں درنزان بنت

یاتاں دوربُنیں چـَنـڈان ءَ

بل که گلزمین ءِ بو انت 

کاینت چَندَنیں گوں یاتاں

آجویں ڈه ءِ شهزاتاں

میریں هَملّ ءِ پُشت - زاتاں

کاینت هرکدیں یاتانی

بود کیت و سرءَ نازینیت

میریں مئی شهید ، مَلّاں بنت

آجویں سمین ءِ زباداں

کاینت ترانگ ءِ ماں مُچّی

کند انت و دل ءَ بود بکش انت

بیل انت و دل ءَ ماں نکش انت

براه انت دپتر و پهرانی

پَهرانی سپاه و روک انت

راج ءِ دپترانی تاک انت 

دپتر روشن و سرگوازی

نکش انت ماں دلاں پر پهریں

راج ءِ هستی ءِ گوناپاں

میریں ماں منگه و دوداں هم

میری مُچّی و دیواناں

نام اش کلگ و کوچگ بنت 

دَگ ّ و میتگ ءِ براهان انت

نازینکاں هزار 

              نام اش مان

هالواں گوں مات نازیننت

سر بُرزیں هما سالونکاں

هوراں یاں دنیں بانوراں

زهم ءِ شیکگ اش سازے ات

زند اش په چـَم و رازے ات

کوهیں چو کلات ءِ داب ءَ

آسیں سینگاں

             پر مهریں

دیمپاں بیتگ انت تیرانی

بچینتش وتی راج و مُلک

آزاتیں دلانی واهگ

چیدگ هم نشان انت نامش

پهر انت سَد چُشیں بیلان ءَ

بیلانی بَزیں دیوان ءَ

بیلاں و مزار شیران ءَ

مَؤت اِش پاترپ 

             هم داتت

کنداں په مراد ءَ رپت انت 

بیم ءِ ترونگلاں مؤت گیچیں

راج ءِ دُژمناں بیم رتک انت 

نپت و ساوڑ ءِ چو گروک ءَ

 جلات ءِ دل ءَ ماں کپت انت 

پروشت اش دژمن ءِ پئوجان ءَ

گلامی ءِ مار دَجیں لوپان ءَ

آزاتیں ره ءَ رَندان ءَ

ندر انت گر په راج جهدان ءَ

نام اش داں ابد برئکشان ءَ

نام اش تاں ابد برئشکان ءَ

نام اش تاں ابد.....

کریم بلوچ _ تـهـل

11/03/2017