! مال ءِ تاوان پہ جان ءَ سیت انت

چه "بتل گنج "ءِ کتاب 

غلام فاروق بلوچ 
! مال ءِ تاوان پہ جان ءَ سیت انت

ایشی ءِ باور ءَ اے کسّہ انت کہ یک رندے یک ھدا دوستیں مردمے ءَ چہ ھُدا ءِ کِرّ ءَ دعا لوٹ اِت کہ آ دلوتانی بولی ءُ لبز ءَ سرپد بہ بیت- آئی ءِ دعا قبول بوت ءُ آ درھیں دلوتانی بولی ءُ گپّاں پوہ بوت-یک رندے پِشّی یے گوں دگرے ءَ گُشگ ءَ ات- 
 "بِاندا واجہ ءِ پَس ءَ دردے گیپت ءُ مِرگی بیت ءُ آئی ءَ را کُشنت ءُ ھِلار کننت، نارُشت ءُ گوشت مُچّ بیت،، 
واجہ سرپد بوت ءُ ھما دمان ءَ وتی پس ئِے قصاب ءِ کرّ ءَ بھا کرت- 
 دگہ روچے کُچِکے گشگ ءَ ات کہ باندا واجہ ءِ ھَرّ مِریت، ھڈّ ءُ گوشت ءَ سیر بئیں-واجہ ءَ ھما دمان ءَ وتی ھر ھم پہ ارزان ءَ دگرے ءِ گوْر ءَ بھا کرت- ھمے ڈول ءَ بوّان ءَ واجکار ءَ وت ءَ را چہ بازیں دلوتانی مَرک ءُ تاوان ءَ رکّینت-آ سکّ گَل ات-بلے یک رندے ھرے سَرّگ ءَ ات ءُ گشگ ءَ ات کہ پونشی واجہ ءِ بچ مِریت-آرا سک تور ات دل ءَ نہ منّ ات ئِے کہ چوش بوت کنت بلے گوْستگیں تجربہ ئِے دیما اتنت- آئی ءَ گریت ءُ دعا لوٹ ات بلے چہ غیب ءَ آواز اتک "تئی زھگ الّما مریت- اگاں تو وتی مال ءِ کمّیں نقصان بہ اِشتیں تہ ترا مزنیں نقصانے نہ بوتگ اَت-اگاں تو پس ءِ نقصان بہ اِشتیں ترا ھر ءِ نقصان نہ بوت، اگاں ھر ءِ نقصان بہ اشتیں تہ اُھشتر ءِ نقصان نہ بوت، اُھشتر ءِ نہ اشتیں تہ ترا اپس ءِ تاوان نہ بوت ءُ اگاں اپس ءِ تاوان بہ اشتیں تہ ترا زھگ ءِ مرک ءِ مزنیں تاوان نہ بوت،، -
 نوں مرد سک پشومان بوت کہ دِرْیگتیں آئی ءَ دلوتانی بولی مہ زانتیں ءُ کسانیں نقصان ئِے بہ بوتین اتنت، تاکہ آئی ءَ را چوشیں مزنیں تاوانے مہ بوتیں- اے ڈول ءَ چہ کسو ءَ ھمے رھبند گیشّینگ بوت کہ مال ءِ نقصان ءَ ھچ پرواہ کنگ نہ لوٹیت-اے کسّہ ءِ ٹہینگ ءِ مقصد ھمیش انت کہ ھرچی بیت بہ بیت، انسان ءَ را باید انت کہ پریشان مہ بیت چیاکہ صبر ءِ بر شیرکن انت!