آزاتی ءِ اِشک

آزاتــی ءِ اِشـــک 

       

         ( گئوس بشک بیزنجو ءِ چارده سال ءِ بے مُهاڑیں سزا ءِ سر ءَ )

میر گل خان نصیر

شاشان1 نه بیت گوں دَکهے هِیرت

مِهران2 نه بیت شلاپگ ءَ هُشک

مُشت ءَ،من ندیسته گواتءَ کس گِیرت

کوه ءَ را کڑک3 نه کرت کنت مُشک

                                 اَو، تاکت و وَس ءِ کیهویں مَست!

                                 کئومانی مسال انت پَهبّ4 و شاشان

                                 آزاتی ءِ اِشکءَ ، گوات من بَست

                                 تو مُشکے ئے هرچی بئے مزن شان

آزاتی ءِ اشک ءَ کئیت گوں ساه ءَ

ساه ءَ گوں،بُت ءَ چه درکپیت رَؤت

کوهانی سَه ءِ ، بپرس چه ماه ءَ

کئومان ءَ  نئیت دائمیں مَؤت

                               گوں یک و دو کسّ ، یا هزار ءَ 

                               کـئـومانی کدی نه ، ساه سستگ

                               تاچینتگ ئنت هون ءِ جو،ڈگهار ءَ 

                               کئومانی نه اَنگه ، ساه سِستگ

بیزنجو ءِ پانزه سال ، چے انت

هپت5 بیریں  بلوچ تو داتئے پاهو

انجامی بگند،مَں کوهاں کئے انت

زور ءَ گوں پچے نه بیتنت لاهو6

                              اکبر7 تئی کئیزاں زجر کشیت

                              زندان ءِ تنیر8 ءَ مَجگی آ پئنت

                              ترسیت بگوئش ! یا اچ تو وَش بیت

                             یا ، پسهے ، کرکزانی چاپئنت

ٹیل ئنت رچنت ، اے هون سُهوریں

دشت و جبلاں مَن ، آس لائنت

مرچی تو بکش ، ببند و بوریں

مردانی سر ءَ ، اے روچ کائنت

                              البت ، تو بزان که هون و بیر ءِ

                              سَد پُشت ءِ، بلوچ، هساب دار ئنت

                              دست ءَ ، مَں دپ ءَ دَیئنت شِـیر ءِ

                              هونی ءِ دل ءَ ، گوئجنت و کارئنت

گوات ءَ تو، اگں مَں مُشت دارئے

شاشان دیئے ، چو جَـمـر ءَ بال

اَنگت ! تو گمان دل ءَ میارئے

آزاتی ءِ اِشک ءِ سر، کنئے جهال

                            یکے ءِ بدل ، هزار کائنت

                           سِرین بستگ ، چاڑ و ٹهل و پیوست

                           ورنائیں دلاں مَں آس لائنت

                           آزاتی ءِ اِشک ءِ، کیهییں مَست

آزاتی مئے هکنت ، هکنت آزات

سر رَؤت برؤت ! نه کِلّوں هکّ ءَ

بے شکّی زنوں،گروں نه هیرات

بیڑ داته، پدا نه پُروشوں چَکّ ءَ

                                    

                                ساهیوال ءِ جیل

  

                              30 جون 1968

1- شاشان : کوهے جهالاوان ءَ .

2- مهران : دریایے سند ءَ .

3- کڑک : ٹنگ .

4- پهبّ : کوهے جهالاوان ءَ .

5- هپت هیکل : بتئ و سنگتان .

6- لاهو : رامگ .

7- نواب اکبر بگٹی .

8- تنیر : ترون . تندور .

                 ( کلیات نصیر سال 2014 . تاکدیم : 1695،1694 و 1696 ءَ )