« پهره روتاک » « روزنامه پهره »
ادبیات بلوچ« پهره روتاک » « روزنامه پهره »
ادبیات بلوچ! جـــنــــگ انت
! جـــنــــگ انت
گل خان نصیر
پادا ، پادا ، ورنا ، جنگنت
جنگنت ! جنگنت! ورنا جنگنت!
کیچگ و کوهاں گپته زراب ءَ
پادا ورنا! بلّی نیں واب ءَ
شیکگی تیر و گرئندی تپنگنت
جنگنت ! جنگنت ! ورنا جنگنت !
سرپتگ انت ورنا کوه و تلاراں
زرتگ انت گرانیں اگهدگ و باراں
هر که مزار و هر که پلنگنت
جنگنت ! جنگنت ! ورنا جنگنت !
بالی گراباں ، چاپ کنان انت
چو که وکاب ءَ بیڑ دیان انت
گرئنداں ، شنزاں بمب و پشنگ انت
جنگنت ! جنگنت ! ورنا جنگنت !
مارٹر و توپاں چو که نهار ءَ
پَچ کته مردم واریں دَپ ءَ را
دهنز و دهیتے رنگ په رنگنت
جنگنت ! جنگنت ! ورنا جنگنت !
ٹینک چو پیل ءَ لوڈ کنان انت
وَرنا چَئوکیں گوڈ کنان انت
سهور ڈگار گوں هوناں رنگنت
جنگنت ! جنگنت ! ورنا جنگنت !
ورنا چو گرک ءَ ، یا چو مزار ءَ
بیڑ دینت هر وار ، په وار ءَ
گِین لگور ءِ مرچی تنگنت
جنگنت ! جنگنت ! ورنا جنگنت !
پُهلیں وَتن تئی دهنز و مجان انت
باگهـ و چمن تئی کئوم ءِ سُچان انت
وَسپگ ، بیلی ! پر تئو ننگنت
جنگنت ! جنگنت ! ورنا جنگنت !
پر تئی لج و گئیرت و ننگ ءَ
پر تئی کوه و کیچگ و دنگ ءَ
هَلمَه و هلگر کرته دَبنگنت
جنگنت ! جنگنت ! ورنا جنگنت !
پادا ! پادا ! واجه سگهار ءِ
بَیرک ءَ سُهوریں زیر مئیار ءِ
کئے تئی مَٹ و کئے تئی سَنگِنت
جنگنت ! جنگنت ! ورنا جنگنت !
ننگنت کئوم ءِ، ننگنت مات ءِ
ننگنت گهار ءِ ، ننگنت برات ءِ
ننگ کن! ننگ کن! ننگ ءِ جنگنت!
جنگنت ! جنگنت ! ورنا جنگنت !
زگریں نصیر ءِ شئیر و گپتار
استنت جنگ ءِ تُرندیں کِیکار
گوں انت جنگ ءَ ، چاڑ و هشنگنت
جنگنت ! جنگنت ! ورنا جنگنت !
نوشکے
1961 ءِ ستمبر ءِ 17
( کلیات نصیر تاکدیم 599 و 600 )
برای نمایش آواتار خود در این وبلاگ در سایت Gravatar.com ثبت نام کنید. (راهنما)
ایمیل شما بعد از ثبت نمایش داده نخواهد شد