( رَهتـوشَگ )

دست ءَ منا بـِـدئے

                                   ( رَهتـوشَگ )

ڈیوایــے ماں دل ءَ ،
         ڈیوایــے دست کتگ
باندات ءِ شوهاز و پـولگ ءَ روان


آزمان ،
    اُمیت ءِ رَنگ
مهر ،
من ءَ بهشتاں چه ندارگے ...


سنگت ! بیلی !
منی برات و راج
ماں زِر ءِ چـَؤل و مَـؤج انت پیچ و تاب
کـِـرِچک هم نه وَشیں ،
              انیشگان اش پـُـر کـُتگ .


اوشت ،
      بــے بَر انت مـَـوت ءِ رنگ
مَوت ءِ چه نشانگاں .
راهاں که سَرگراں
           شَیطان ءِ سَکـّـیانی جو و آپ ءَ رَند ،
آپسر انت هـُـدای ءِ رنگ
مهر ءِ ترنپ
         زند ءِ زهان ءَ بیت زهاں .


چمـــے منی دل انت
         چمـــے منی سر انت
باندات ءِ رَهتـوشگاں
        منی په جی و جان
                  بیلانی دست و کوپگ انت
بــِــرّیں هزار چم و دیدگ انت
            پیرانی چم و دیدگانی دور تریں برانز ...

دست ءَ بدئے منا
دست ءَ منی بزور
اُمیت ءِ باوراں ما یک کتگ
یکیں که چادر ءَ ما بستگ انت

باور بکن منا
       نیکیں دعای ءِ گوں
باور کت اوں ترا
          راهاں که سَرگر اوں
آزاتی ءِ گوں گوانک ءَ ، جاک ءَ باں
آزاتی ءِ گوں نور ءَ
             روک ءَ باں
آزمان ءِ روکیں ماه و سَد هزاریں اشکراں
پَؤر و سُهیل دابیں استار و انگراں
آزاتی ءِ گوں بانزلاں
            آزمان و کـَـلکشاناں بال ءَ باں ...


دست ءَ منی بزور
دست ءَ منا بدئے
باندات رَهتـوشگاں تپاکی انت
          په راج و زند ءِ سَر بلندی ءَ ...


                                     کریم بلوچ _ تهل                                         14/07/09