آزاتــــــــی

آزاتــــــــی

^^^^^^^

( دلدوستیں استالیں براتاں میر جان محمد جان دشتی و میر عبدالله جان دشتی ءِ یات و نام ءَ )

اَے بهارانی لـَهمیں تو پاربرمش

اَے سَمینانی نرمیں کـَش و کوش 

تو هَمُک دلکشی براهانی

نوکتریں زندمان ءِ نوکیں ایرمادئے

کندگ و نازاں تئی دگه نام انت

روچ ٹـِکانی تو بَرئے نیکیں

شاده و بچکندانی وَش پالئے !

هم مئی ساه ءَ په زبادئے تو !

***

سرپتو ندر انت ، ندر باں سَد بَر

بے ترا گاراں ، آسے ماں ڈوبر

منی دل ءِ هُلانی هُدابُندئے !

***

منی گُل و مهرانی تو آزاتی !

*

روچ ٹـِک بے تو

بیمے دل لرزیں

وَشیانی هم ، گار بنت تاماں

پاد زرابانی ، اِیر بنت داماں

کــُـنـّـت انت زیند هم ، مَؤت ءِ هوشاماں

دلتپرکه کوه ءِ دل هم چَنڈیت

بے سما بیت کُنٹ ، دَؤر ءِ چه گاماں  

 ***

مهر منی دلبندیں تو آزاتی !

*

ترا کجام بَنداں یا که کورچاتاں

یا کجام پئوجی اڈه و هَنداں

یا کجام هون شانیں زراباں ماں

گوں وتی بندی سرمچاراں گوں

یا کجام جَٹـّی و نابزانتیاں

یا کجام هاراں وتگلایی ءِ ،

تهار و بیمناکیں سانکلاں پَـٹــاں ؟

***

دلبریں مِهر اوں !

*

هون زراں دورئے 

من ترا پٹاں راه و رنگراهاں 

تو مئیارانی پَهر دئے ما را 

من ترااَلــّــَم زیراں امبازاں

من ترا ناز ءِ بیرک ءَ دوچاں

من ترا زیند ءِ ساه ءِ هستی باں

پمن ءَ دلبر تو کدیں کائے 

یا کجام گـَٹ انت مئی دراهی ءِ

یا کجام زرمبشت ءِ روشنیں لـَهراں

مئی دراهی ءِ تو سمین ءَ بئے ؟

کریم بلوچ ـ تهل

هارکپ .یو 22.01.15