مرد وتی هکاں توکل و زور ءَ گوں زننت

مرد وتی هکاں توکل و زور ءَ گوں زننت

****************

میرگل خان نصیر

تیگ سپاهانی سوگهیں جُپتاں کید بنت

لدهیں شیر گوں آهنی پلکاں دپ جننت

یا گهیں ورنا جیل و مَں زمزیراں کپنت

تهارمهیں روچاں روک کننت،استاری ترپنت

په وتی کئومی اِزت و ننگ ءَ جه جننت

لئیب گوں پهلیں چوٹو و شمشیراں کننت

یا،وتی سوب ءَ چو گل ءَ سهریں ءَ چننت

یا وتش وشرو بیته چو پهل ءَ سهور بنت

مرد په سیالانی شگان تگهراه ءَ نه بنت

نئے وتی ملک ءَ را دگه کئومان ءَ دینت

نئے وتی ننگانی بدل  تلاهان ءَ گرنت

نئے وتی لجاں اشتگ و روبایی تچنت

کمجراتانی گندگیں هیل و آدت انت

هرکدیں گوازی گرم بیت گوری ترهنت

دُژمنءَ گند انت هپتمی لوگ ءَ چیر بنت

دیمپدیم بیت انت ناگمان،پادانی کپنت

توبه چه ملک ءَ الامان ننگءَ چه کننت

چو مکسک زرانی سرا ریهانءَ رچنت

پنڈگءِزمباں هردوئین دستاں گوں چننت

کمجرات ملک ءَ ننگ و گوں ناموتءَ دینت

مرد وتی هکاں توکل و زور ءَ گوں زننت

شال ( کلی کیمپ) 9 جولایی1959

کلیات نصیر تاکدیم 571

*************************