مــَـــــؤت شـــــــــکار

مــَـــــؤت شـــــــــکار


     { شیر مردیں« آزات رینکی » و شهیدیں آئی ءِ بچّاں عبدالمالک رینکی ،
عبدالحمید رینکی ،نوک ورناییں شهید عبدالغفور رینکی و جهدکاریں عبدالرؤف
رینکی ءِ یات و نام ءَ }


هوشام ءَ مهر ءِ تُـنّـیـگ ، زور انت جُهد ءِ راه

بَلنت نیم شپاں هم ، همنند بنت گوں ماه

مار انت زهیر و درداں ،ترس اش نه انت چه چاه

دَؤرانی تَهر ءَ ماننت ، دپتر به بیت گواه

'

                         پـُلّ انت و هر بهار ءَ آتار کن انت جهان

                         جَمّر به بنت نود ءِ ، وهد ءَ گوں بنت شَلاں

                         امیت ءِ بنت چراگے  ، سمینے کلکشان

                         چَمّگ به بنت په نازے ، زهان ءَ چه زهاں

'

اِستال ءِ شاهدی ءَ ، امیت بنت وَدیگ

بیهار و بیم و مؤت اش ، نے داشت کنت پدیگ

مَلّنت و وهد و دَؤر ءَ ، زور انت رنگ پدیگ

زندگ کننت دلاں ماں ، اوشت سال و هم سدیگ

'

                           امیت ءِ بَر به زان ئے  جهد انت و سوب ءِ راه

                          جهدانی بَر بزان ئے ، سوب انت کن ئے کماه

                           رُژن انت و آسرات انت آباتی انت براه

                          جُهدانی راه ءَ جهدکار ، رَهَز چه بے بلاه

'

                  ( 2 )

راجانی دَپتراں ماں ، هم چِست و کـَپـت انت باز

هر دؤر ءَ دیستگ انت هم ، تَهرانی رنگ و راز

مَلّنت راج ءِ پُسّگ ، جَنگول و وهدے ناز

زندگ به بیت چو راجے ، پیکه به بیت داز

'

                           راج ءَ بلوچ ءِ گواه انت ، دنیای ءِ دپتراں

                           بیتگ مدام آبات ، مئے هَند و کهچراں

                           آزات بیتگ آجو ، پَهر ءَ په دنت سراں

                           زانتکار به بیت و یکدست،لوٹیت وتی دراں

'

آزات چو بلوچ ات ، آبات ماں جهان

لوٹ اِت وتی هساب ءَ ،چه زوراک و واجهاں

حقاں وتی په جنگ بیت گوں شاه و شه تباں

بیت ئی وتی نشانے ، بیت ئی وتی گِدان

'

                          ملک ءِ په سیمسراں هم ،همراه و شَؤر بیت

                         پَد مانگ ئی اَلس کت، همراه گوں دَؤر بیت

                         آزات و سرمتاب ات، دُژمن په جـَؤر بیت

                         مُلک واجه و سر اَت وت ، وژنام ءِ کـَؤر بیت

'

انگریز که زانتکار ات، هتیار و هم په جنگ

پروشت ئی چو باز راجاں،ٹپ ئی کت انت پلنگ

چیر جَت وا بازیں راجے ، آتکگ بلوچ ءِ دَنگ

کُشت ئی بلوچ ءِ شاه ءَ ،« مهراب »‌شه نهنگ

'

                            ایلگار انگریز ءِ ، کرتگ بلوچ تباه

                            بازانی چاتاں بند کت ،بازانی گپت ساه

                            بازانی کت درانڈیه ، بازانی کت بیگواه

                            بازانی سار ئی گپت انت ، چیزے گُلام مڑاه

'

گَشتگ بلوچ ءِ دؤر و گَشتگ بلوچ ءِ روچ

داتگ بلوچ جنگاں گوں هَلمه و گروچ

سُتک اِش پد انگریز ءِ ، انگریز هم بے موچ

بهر ئی کُت انت مُلک ءَ،لوگ ءَ و جاه و کوچ

'

                           وَنڈئی کت انت بلوچاں سئے جاه و سئے بهر

                          سئے مُلکءَدَین ئی دات انت،حقی کتنت زبهر

                           ایران و پاکستان ءَ ،کُرت ئی بلوچ ءِ سر

                           اوگان ءِ بادشاه ءَ ، چُنڑے وا دات هنر

'

هَتیار و پئؤج باز ات اِے ملک ءِ بادشاه

سرچوپ کت اش بلوچاں،گینگر بیت ساه

بست اِش و چُپت و کُشت اش، بے جُست و بے گناه

راج ءَ بلوچ ءِ پَشت کپت نے پهر و نئیکه ٹاه

'

                          چیزے که جه جتگ هم راج ءِ په عزت ءَ

                          بیگواه و گار و سرچوپ ، بیت انت اناگت ءَ

                          حقے نه ات بلوچ ءِ ، نے مُلک و دَؤلت ءَ

                          بیگواه ات مُلک ءِ واجه ،لـَنڈر وا شدّت ءَ

'

نے بیت زبان بلوچ ءِ ، نے دود و نے رواج

بُرتگ بد اچ بدوّاں ، لَکے دوسر وا باج

کَپت جَهل عزت و شان ، هاکاں هوار تاج

پرشتگ یلانی دیوان ، بور ات لـَوَنگیں راج

'

                          چیزے وا لـَڈ اِت انت هم داں مَند و زنگبار ءَ

                          بلوچ ءِ شاهی بیران ،موتکاں و بَژن ءِ جار ءَ

                          دَپ چَٹ چُنت کس هم ، بد ءَ گوں همتوار ءَ

                          بینگانی داب په زَنبے ، هَڈ چونڈی ءَ هوار ءَ

                    ( 3 )

دَؤر انت که تَرّ ایت دائم ، راجانی زور و واک ءَ

کـَد جیل و بند و سرکـُٹ،دار انت راج ءِ جاک ءَ

دپتر وا جهد ءِ نام انت ، جُهداں گوں لِیٹیت تاک ءَ

زُلم ءِ نه مانیت دَؤر هم ، گر که به بیت شیپاک ءَ

'

                             زوراکیانی سیه شپ لـَوَنگ شپ چراگ چو

                             بَلنت و رُژن شاننت ، زانت ءِ بَل و سما گو

                             استار بنت دلاں ماں ، امیت و بیوس ءِ شو

                             ژولّیں سیه شپ ءِ زُلم،کـُٹیت ٹـِکّ بدنت رو

'

جنگول چیزے چست بیت حقاں وتی په لوٹ

آس دات زند و جان ءَ ،زُلم ءِ به سوچ انت کوٹ

نام اِش تاں ابد بیت ، راج ءِ دل ءَ ماں نوٹ

آزاتی ءِ ره ءَ چه ،هچ وهد نه بیت انت چوٹ

'

                             ایران ءِ مُلک ءَ آتک چو روباه و ملا زاتاں

                           هٹلر چه کشت و هون اش،سر کرتگنت یاتاں

                             نے کـُرد و نے بلوچ اش ، نے ترکمنیں براتاں

                             نے پارس و نے عرب اش پَجّ ءَ نکت کمزاتاں

'

بلوچ ءِ ڈیه هولّ بوت جادوگرانی دست

کس تَتک و جِست و چیر بوت،کس مَنجلاں گرست

دپار بوت بند و دار ءِ ،کس سیمسراں چه رَست

کس جهجتگ په راج ءَ ،سر و سرین اِش بست

'

                             ایران ءَ آتکگ انت چو جادو و ملا زاتاں

                             کـُرتش هما که منگول،گواه هم نداته یاتاں

                             هولّ بوت په جن و چوپ،پجّے نبوت په ماتاں

                              لیبے وا دست ءِ گـُڈگ،هون ءَ وا پُرّ چاتاں

'

« آزات » زرت رُمبے بچّاں چه سرمچار

زُلم ءِ بد ءَ په آسے ،راج ءَ په مهر وار

هم رینکیانی زات و هم راج ءِ پهره دار

هم تولگانی جان ءَ ، شیر بیم و سک مزار

'

                              درکپتگ انت پڑ ءَ ماں۔ هم جنگ ءَ په نشان

                             کوه و گران اش کت جاه کینگءَ چه جُشاں

                            تَهلیں بد اِش جتگ باز،باز اِش کتگ کُشاں

                            ترس و چه بیم لرز ات،دُژمن وا بیت هُشاں

'

هور و هوار ات ورنا ، یلیں سرمچار

شه بکش و نارویی هم، قنبرزیی کتگ توار

دهمرده و گمشادزیی...بارانزیی هوار

یک بیت بلوچ ءِ راج و یک بیتگ انت مزار

'

                           شیر بیمیں نرمزاراں عبدالمالک ات سر ات

                           براتاں و راجی دیوان ، اِستارے  پــدّر ات

                          بستگ سُرین شپ ءِ دیم ،کاٹار و هنجر ات

                          سئیں براتی همراه،بیت انت چو ره گَر اَت

'

عبدالحمید ات مَستر ،هم جنگ ءَ بیت روان

بازیں بیلی زرتگ، ماں جنگ و جیڑواں

دُژمن ءِ دلی کباب کت گوں جنگ و هملواں

بندیگ ماں پاکستان بیت،بُرت اِش ماں کوڑواں

'

                       سر داشت بُرز و گوئشت ئی:زُلم بیته مئی سرا

                       جاتوگیں دیه و ملاّ ، سُچاں چو انگر ءَ

                       برداشت کناں بد ءَ نه ،ٹـِکّ گوئشت آ نر ءَ

                       پاهو ءِ دار ئی چُکّ اِت،هم راج ءِ هاترا

'

عبدالغفور برتگ موٹلے گوں شوروان

گینگر په «پاسداراں»،اهانی سُتکه جان

وت هم زراب ءَ بمب ءِ، رپتگ چه اے جهان

میرکمبری مزار چو ،وَژنام نوجوان

'

                          عبدالرؤف ات چارمی ، براتانی بیت توار

                          شهمردیں سرمچارے،حق لوٹ و بُرزجار :

                         ننگ انت که زُلم ءَ مَنّ اوں،راج اوں به بیت وار

                          آزاتی ءَ وتی په ،ندر انت ساه و سار

                      ( 4 )

« آزات » جهجتگ چه ، دُزّآپ ءِ گنجیں شهر ءَ

بلوچ ءِ هَنداں هرجاه رپتگ وا بـــاز  بــــار ءَ

بَچّ ئی به بیت انت نامدار،جهداں و گوں هنر ءَ

وت بالت انت گوں آس ءَ ،روک اِش کتگ گوں سر ءَ

'

                             نام اِش چه مُلک درشت،هرکوه و هر گَرے

                             اِستون ءَ چو توار کت،گرئندانی کُهکرے

                             مُلک ءَ بلوچ ءِ درگوئست،دنیایءَ بیت سرے

                             پَهرے بلوچ ءِ دل بیت،دُژمن په هنجرے

'

مانیت جهان ءَ نامی،میرکمبرانی گوں

دنت انت بلوچ ءِ ورنا،نوروزءِ داب شون

اکبر به بیت به مُلّیت،زردکوهی نَدر هون

بیرک کت اِش بلوچ په،وتی ساه و جون

'

                          هَے هَے شهیدیں سالونک مَلّ ئے دلاں به مَلّ

                         سر جَهل انت تئی سلاماں،ساراُں دمے به جَلّ

                           لَؤزاں به یاینت رد بنت ، بَر شان به بنت وَلّ

                           بیلانی شپ چراگ هم ، بـُـرّانی بُـرّ و گـَـلّ

'

کاینت سَکّی ءِ روچ ،کاینت جهدکار

اے راه ءَ درکپ انت هم،راجانی لک سوار

بیم ءَ دَینت بیهار ، مَـؤت ءَ کن انت شکار

مانیت نام اِش دائم ،ماں دپتراں مزار

'

                          «مالک»به بیت الّم، چه کم دروریں سراں

                          «یعقوب مهرنهاد»چو ،راج ءِ چه مهروراں

                          « حمید » چو برشکنت ، آسے دلیں پُراں

                          « غفور » نوهلیں هم، مهر ءِ چه دَروراں

'

ساه اِش بداتیں زند چو،ساه اش بداتیں راج

راج ءَ په پهرے بیت انت،هاک اِش نداته باج

ورناییں کنگراں په،بیت انت امیری تاج

دودانی بیت انت دَروَر،داشت اِش وتی رَواج

'

                           شیرانی شیرشکاری و هَپتار ءِ مور گِرَگ

                           ماننت زمانگاں ماں ،جنگاں بنت سِرَگ

                           آبات بنت راجاں ،دروگاں بنت دِرَگ

                           گار کد نه بنت جهدکار،هچ وهد په مِرَگ

'

شاباش زُلم شکار و شاباش همبلاں

دائم به بات اِت مئے یات،دائم به بئت گَلاں

راجانی تاج بات اِت،سوبانی هم نشان

زُلمانی وَلگوَجوک اِت ، آباتیں ملپداں

                               ( 5 )

لَـکّیں سلام بات انت «آزات »ءَ همبلیں

پُشترند و راجی زهگ ئی،سرگوئسته شَر تَبیں

بَستگ سُرین و همّت شیرانی سانکلیں

ساه ءَ چه گوئستگ انت سر، سالونک همدلیں

'

                         لکّیں سلام بات انت، شیریں شیرزالاں

                         مهر ءِ که داتگ انت شیر،نوکزات و نوک نهالاں

                        رودینتگ اش په راج ءَ،شیربیم و شیر هالاں

                        کـَٹ اِش کتگ په مردی،هم نام و هم کمالاں

'

لَکّیں سلام بات انت،سربُرز هم هما مات

عبدالمالک ئی که گوئر دات،راجی کتگ په سوگات

ناترس و سرمچاری رودینتگ انت شر زات

دل ئی به بات کوهے،راجانی دپتراں یات

'

                        شاباش لکّ هما دل،بند انت سُرین په راج ءَ

                        زند ءَ چه سرگوئز انت وت،راجءِ په بیه و باج ءَ

                        دار انت پَهر و دوداں ، مردی په بنت تاج ءَ

                        گُٹ گِر کن انت بدواه،زُلم ءِ نه مَنّ انت واجه

'

پئؤجانی دیما دارگ، لَکّاں و هم هزار

کار انت بلوچ ءِ ماتاں، پهراں په نامدار

بیرک بدار انت راج ءِ ، بلوچ ءِ مَلگزار

چَنڈ ایت و بیت گواتو ،تاں زندگ انت مزار


                                          کریم بلوچ _ تَـهـل

                                      2010 ءِ جون ءِ گـُڈی روچاں