« پهره روتاک » « روزنامه پهره »
ادبیات بلوچ« پهره روتاک » « روزنامه پهره »
ادبیات بلوچماهیگ گِریں پـِـشـُک
http://audioskazki.net/
Владимира Григорьевича Сутеева
ماهیگ گِریں پـِـشـُک
ولادیمیر گریگوریچ سوتیوا
کریم بلوچ _ تهل
یگبرے پشکے شت تاں ماهیگ بگریت . راه ءِ سرا پچیں هَندے ءَ روباهی دیست .
روباه وتی پر پژمیں دُمب ءَ چنڈینت و گوں شیرکنیں گالوارے گوئشت ئی :
_ سلامالیک منی پت و پتو ، پرزیبیں پشـَلـُک ! چه تئی گِندک ءَ وَش اوں ! ماهیگ گِرَگ ءَ رَوَگ ئے ؟
- جی هَـؤ ! لوٹاں که پر وتی پشیاں ماهیگے بگراں .
روباه سرءَ جهل کت و گوں نرمیں آوازے ءَ گوئشتی :
- بلکیں بیت که منا هم ماهیگے به وارین ئے ؟ من چه بازیں مُرگانی ورگ ءَ ژند بوتگ اوں .
پشک بچکند اِت و گوئشتی :
_ جوان انت . سری ماهیگ ءَ ترا دیاں !
_ من نزاناں که هنوں چون تئی نیکی ءِ بدل ءَ ادا بکناں .
.
- پرواهے نهنت ، هچ نلوٹیت .
پشک دیما روان ات و روباه آئی ءِ پشتا سٹک جناں پیداک ات و گوں وت گوئشان ات :
- سَری ماهیگک منیگ انت ، سری ماهیگک منیگ انت !...
راه ءَ اناگت ماں جنگل تها ، چه درچکانی نیام ءَ مزنیں بونژیں هاکی ییں گرکے درکپت
_ سلامالیک منی براتـلُک _ گرک جَکّ اِت _ ماهیگ ءِ گِرَگ ءَ روان ئے ؟
_ جی هَــؤ ، لوٹاں وتی پشیاں ...
_ هَـؤ ، پر من هم ... ماهیگکے ودی کنئے منی براتلک ؟ چینچو من بز و میشاں به وراں ... منا هم نوکیں تامے گزر انت !
پشک بچکند ات و گوئشتی :
_ نون جوان انت . سری ماهیگک روباهیگ انت و دومی تئیگ !
_ شاباش منی براتک ! من تئی منتواراں !
.
_ پرواهے نهنت . هچ نلوٹیت .
سرجم دیما روان بوت انت نزیکیں کئور ءِ نیمگ ءَ . پشک جنگل ءَ روان ات و آئی ءِ پشت ءَ روباه سٹاں پیداک ات و وتا وت گوئشان ات : « سری ماهیگک منیگ انت ، سری ماهیگک منیگ انت ! »
گرک آهانی سر ءِ پشت ءَ جنزاں و لپونزاں گوں آرامی ءَ هولاسان ات :
- دومی منیگ انت ! دومی منیگ انت !
اناگت چه جنگل ءِ تهار و ژیمبیں پهنات ءَ ممے آهانی دیما درکپت .
پشکی که گوں نئیگ (نئی،کُنڈی،چنگ ) ءَ دیست ، گوں زنڈیں و بَـؤریں توارے گوئشتی :
_ هَو منی بچلک ! ماهیگ ءِ گِرَگ ءَ سرگپتگ ئے ؟
_ هو لوٹاں وتی پشیاں ...
_ گوش کن منی بچ ؛ واکی تو منیں کماش ءَ ماهیگے ندیئے ؟ منا ماهیگ وَا چه گین و ساه هم گیشتر دوست بیت ! چینچو گوک و کاریگر ءِ ورگ _ گوں کانٹ و سُرمباں ...
پشک پونزهند جت و گوئشتی :
_ سری ماهیگک ءَ من روباه ءَ لبز داته ، دومی ءَ هم گرک ءَ ؛ ترا گڑاں سئیمی رسیت .
_ بلّ ئی که سئیمی انت . بلے چه پهکاں مَسترینے ببیت !
_ جوان انت .
.
سرجم دیما جنزان بوت انت ، نزیکیں کئور ءِ نیمگ ءَ . دیما پشک روان ات و آئی ءِ رند ءَ روباه سٹگ و روگ ات ، و روباه ءِ رند دُزیں گرک ات و گــُـڈی لــُڈوکـیـں مم ات .
روباه گوں وتی سٹگاں گوئشان ات :
_ سری ماهیگگ ، دلجمی منیگ انت ...
گرگ وَش وَشـُک هولاساں گوئشان ات :
_ دومی ... منیگ انت .
_ سئیمی _ چُشیں مزنینے _ منیگ انت ! _ مم نرنڈاں گوئشت .
و چو پهکاں همراه اتنت و آپ ءَ رَست انت .
پشک وتی پیلک ( گونچان ) پَچ کت ( بوهت ) و ایر کت و ڈولی هم کناری نات و نئیگ بزاں کنڈی ءِ بند ءَ هم راست وبرابر کناں بیت . روباه ، گرک و مَـمّ هم هما نزیک ءَ کاهانی سرا نشت انت : .
,
وتی بهر ءِ ودار اتنت که کدیں پشک اش بگر ایت . پشک زراگے نئیگ ءِ سرا بست و نئیگی آپ ءَ سَٹ اِت و آرامیں جاهے نِشت و چمی نئیگ ءِ بند ءِ برزیں نشان ءَ سک کت .
آئی ءِ همراهانی چم هم نئیگ ءِ بند ءِ نشان ءِ سرا سک اتنت . و ودار ءَ نشتگ اتنت .
روباه گوئشگ ات :
- گِرَگ ببئیت ماهیگکاں ، ٹوهیں ( مزنیں ) و کسانیناں ...
و اناگت نئیگ ءِ بند ءِ نشان سُرت.
روباه سُبکیں ساهے کــَشـّـِـت و گوئشتی :
_ اُه منی ماهیگک گِـرَگ بیت !
نئیگ ءِ بند ءِ نشان تـُرّ وراں بیت . جهل و برز بوت . چه آئیا موج و آپ ءِ لرزگ هر نیم ءَ شتراں و تالان بوت انت .
_ اشتاپ کن ! تیز کن ! منی ماهیگک ءَ بکشّ ! _ روباه گوانک جت .
پشک گــُڑست _ نئیگی چـِکـّـِـت و کــَـشـِّـت . نگره رنگیں ماهیگک چه نئیگ سست و چلپ آپاں کپت و آپ ءِ جَهلگ و بُن ءَ شُت .
_ دَرشـُت _ گـُرک پُوش اِت . _ اِشتاپی کت ، پوک و هوڈے ، گوانکی جت ... نوں ، نوں منی باریگ انت ! منی وا در نـَرؤت !
پشک نئیگ ءَ دگه زراگے بست و اپدا آپی دَؤر دات .
گرک وتی پاد ءِ دل ءَ مُشت و گوئشتی :
— Ловись, рыбка, большая и крупная… Ловись…
_ گِـرَگ ببئیت ماهیگاں ،مزنیں و ٹــَریناں ... گِـرَگ ببئیت ...
همدان ات که نئیگ ءِ بندیں نشان چـَـکــَـرّاں و تـُـرّ وراں بوت . پشک نئیگ ءِ دَستگ و دار ءَ مـُـٹ کت .
_ مَـکــَشّی ! _ گـُرک هولاسِت . _ بــِـلـّـی که ماهیگ ءَ جوان به گِراِیت !
پشک نئیگ ءِ دستگ ءَ یله کت و نئیگ ءِ برزیں نشان هم اوشتات .
_ هـَـؤ هنونی بکــَـشّ ! _ گــُرک پـَرمات .
پشک نئیگ ءَ کــَشّ اِت _ نئیگ ءِ چـَنگل و سُنٹ ءَ هچی مان نیست ات .
_ وداری کت ، _ روباه کٹی کِٹی کند ات . _ تئی ماهیگ سرجمیں زراگ ءَ
وارت !
پشک سئیمی گـَشت نئیگ ءَ زراگے پر کت و آپ ءَ سَـٹـِت .
_ نیں هنوں آرام بنندیت ! _ مم گــُـرّ اِت . _ اگں منی ماهیگک ءَ بترسینیت ؛ من زاناں و شما ! ... هـَـؤ ، همیش انت !!!
نئیگ ءِ نشان پهک آپ ءِ تها بُکّ وارت ، روباه هما نیمگ ءَ جانکــَشّ کت : همیش انت ، همیش انت گِرَگ بَیَگ انت ...
_ هاهاها ! هاهاها ! _ مم وتی گــَل و وشـّی ءَ درشان کنئگ ات . _ اے منیگ انت ! چو که جه یهت ، چه پهکاں مَسترینے !
پشک گوں هزار شِرّی ، آپ ءِ کِرّ ءَ وتا داران ات : مزنیں ماهیگے ، آ انت بچارتی ؛ آئیا آپ برگ انت .
آ انت چه آپ ءَ جه یهت ، بروتی ییں ترسناکیں لپونزی هست ... آ اِنت پشک ماهیگے !
_ سری مناں ، اے منیگ انت ! ... تری ندیاں !!! _ اناگت روباه گوں جاک و کوکار آپ ءَ دَؤر کت .
_ نااااااااااا ، تـُـلـّــُس و شـُرد مه بئے ... منیگ انت ! _ گـُرک هولات و آ هم روباه ءِ رند ءَ آپ ءَ دَؤر کت .
مم آپ ءِ کـَش و تیاب ءَ اوشتات و گوں سرجمیں زور ءَ گــُـرّ اِت :
_ شما منا هـُـوول کت ! من اِش هـوول کن... ! دُزّاں ... !
نوں آپ ءِ توک ات که جنگ چست بوتگ ات . گرک و روباه چه یک و دگر ءِ دست ماهیگ ءَ گِراں و چکاپان اتنت . مم هم تاں دیر وهد - ودار نکت و تتک ( جـِسـت) و آپی دَؤر کت .
کئور ءِ آپ ، چُش که جوشوکیں چهجوش ءِ آپ ، بلبل کنان ات . و وهدے وهدے کس یے سر چه آپ در بوت : کدیں روباه ءِ ، کدیں گرک ءِ و کدیں مم ءِ . چے ءِ سرا آهاں جنگ اتنت _ زانگ نبیت . ماهیگاں دیر ات که چه اوداں اژناگ کتگ و شتگ اتنت .
.
پشک وتی دل ءَ وَش ات ، بچکند اتی و وتی نئیگ و سامانی زرت انت و شت تاں په ماهیگ گرگ ءَ دگه جاهے شوهاز بکنت . جاهے که آرام ببیت .
