شراب (ترنداپ

شراب (ترنداپ

شرابیانی نام ءَ

سُنّی مذھبیں عمر خیاّم ءُ راوندی ءِ گوشتن ءَ چہ جمشید ءِ خاندان ءَ خراسان ءَ باد شاھے شمیران ءِ نام ءَ بوتگ . یک روچے مُرگے پریات کنان آئی ءِ تھت ءِ دیم ءَ نند یت کہ مارے ءَ آئی ءِ گردن ءَ وت ءَ پتائتگ . گندگ ءَ مرگ وتی نجات ءَ چہ بادشاہ ءَ لوٹیت .شمیران ءِ بچّ بادام کہ چالاک ءُ زبردستیں تیر اندازے ات گوں پت ءِ اشارہ ءَ مارءِ سر ءَ گوں یکّیں تیر ءَ زمین ءَ دوچیت ءُ مرگ ءَ نجات دنت.یک سالے ءَ رند ھما روچ ءَ مرگ پدا کیت ءُ چیزے کہ دپ ءَ ات بادشاہ ءِ دیم ءَ ایرکنت ءُ بانگے دنت ءُ روت . وھدیکہ دیوان ءِ مردم چار انت چنت دانگ انتءُآیانی کشگ ءِ شور بیت . کشگ ءَ رند ھنگور رُدیت ءُ نیبگ دنت .کواس ءُ زانتکاریں مردم گوش انت اے نیبگ ءِ نپ ءُ سوت آئی ءِ آپ ءَ بوت کنت.باید انت کوزگے ءَ بپرنچیں ءُ چاریں باریں چے بیت . ھنچش اش کت

یکروچے باگپان ءَ گوں بادشاہ ءَ گوشت کہ کوزگ ءِ آپ چہ جُشگ ءُ پُکّگ ءَ آرام گپتگ ءُ ھنوں ساپ ءُ لسّہ چو یاقوت ءَ ترپگ ءَ انت. کواساں گوشت نیبگ ءِسوت ءُآسر ھمیش انت.بلے کس نزانت کہ اے کشوکیں زھرءُ یاکہ زھر ءِ درمان انت.پہ آئی ءِ چکاّس ءَ یک بندیگے ءَ کہ کوش ءِ سزا دیگ بوتگ ات آورت اش ءُ چہ آ آپ ءَ کدّھے آئی اش دات.تنگگ ءَ رند آئی ءَ وتی مورک مجیت بلے کمّے وھد ءَ رند دگہ کدّھے لوٹ ات.گوں آئی ءِ تنگگ ءَ وش شادان ءُ کندان بوت ءُ بے پروا چہ شاہ ءُ وزیر ءَ پاد آتک چاپ جت ءُ ناچ ءُ سُھبت گپت ءُ سوت جت . پدا سیمی کدّہ کہ تنگِت آرام بوت ءُ, گرانیں وابے ءَ شت ءُ دانکہ بامگواہ ءَواب ات. اے ڈول ءَ ھنگور ءُ شراب بزاں ترنداپ ءِ پجاّر بوت

ملایانی گوشتن پہ شراب ءَ
...................................
شیعہ مذھبیں مجلسی ءَ بحار الانوار ءَ نبیستگ : کہ حضرت آدم کہ چہ جنتّ ءَ گلینگ بوت ءُ زمین ءَ آتک آئی ءَ ٨٠ درچڪ ءِ شاھل گون ات کہ چہ آیانی نیمے پشت ءُ نیمے ءِ لاپیگ ورگی ات . دگہ گوالگی پُرّے چہ بازیں درچک ءُد ارانی تُھم ھم گوں وت ءَ آورت.ھنچو کہ ھنگور ءِ شاھل کشت شیتان ءَ تاووسے آئی ءِ بُن ءَ کُشت ءُ درچک ءَ تاووس ءِ ھون چوس ات. ھنچو کہ تاک جت شیتان ءَ شادکے آئی ءِ بن ءَ کشت ءُ ھنچو ھنگور ءَ بر ءُ نیبگ دات شیرے آئی ءِ بن ءَ سر بُرّاتءُ گڈ سر ءَ گرازے . پھمیشا شرابی مردماں اے چاریں جناورانی وڑ ءُ پیم ءَ انت.ساری ءَ دیم ءِ رنگ بدل بیت ءُ تاووس ءِ پیم ءَ جلوان دنت. وھدیکہ سراماز بیت شادُک ءِ پیم ءَ ناچ ءُ سھبت کنت. ھنچو کہ سرامازی چہ ھدّ ءَ گوزیت چھ شیر ءَ گُرّیت پہ جنگ ءَ لاکاریت. ءُ گڈ سر ءَ گراز ءِ پیم ءُ پوڈزاھر بنت وراک ءُ لنڈری ءِ واھگ درشان بنت ءُ گڈ سر ءَ وپسیت

روضتہ العلما اسپانک ءَ گوں نوح ءَ ھمگرنچ کنت
وھدیکہ نوح چہ بوجیگ ءَ ایرکپت درچک کشت ءُ تھم چنڈ ات . ھنچو کہ ھنگور کشت شیتان آتک ءُ آئی دم جت , ھنگور ھشک بوت .نوح دلگران بوت کہ اے ارزشداریں درچک پرچا ھشک بوت. شیتان آتک ءُگوشت ئے اگاں تو لوٹئے اے درچک پدا سبز ببیت من چنت گنگدام اشی ءِ بن ءَ کُشاں .نوح ءَ آئی ءِ ھبر منّ ات. شیتان ءَ شیرے پُشنزے کچکے روباھے تولگے ءُ کروسے آئی ءِ بن ءَ سر برّاِت .درچک سبز بوت ءُ شش رنگ پہ ر نگیں نیبگ دات . پیش ءَ یک نیبگے داتگ ات . شرابی اے ششیں جناورانی ڈول ءِ انت . چو شیرءَ دلیر چو پشنز ءَ گزبناک چو تولگ ءَ وت ءَ نجس کنت چو کچک ءَ دپ جنت روباہ ءِ ڈول ءَ مکر ءُ ھنر کنت ءُ ھنچو کروس ءَ بانگ دنت.پہ ھمیشاہ شراب پہ نوح ءُ آئی ءِ امت ءَ حرام ءُ نبکشادہ بوت .مجمع النورین تاکدیم ٣۵٣
محمد بن احمد توسی ءَ عجایب المخلوکات تاکدیم ٣٢٣ ءَ نبیستگ ; واجہ ھدا ءَ ھنگور مھتر آدم ءَ دات شیتان ءَ بد بُرت ءُچہ آئی ءَ دُزّات . مھتر آدم زھر گپت .دوئینانی میان ءَ جنگ مچّ اِت . جبرائیل توک ءَ کپت .نیمے اشی ءُ نیمے آئی ءَ دات .شیتان ءَوتی بھر کِشت ءُ آئی ءِ بُن ءَ مِشت (مس کت),سیاھیں ھنگور نیبگ دات , شراب ءِ ھنگور بوت پھمیشا جُشیت

وھدیکہ آدم زمین ءَ آتک . جبرائیل ءَ جُتکے گوک آورت کہ کشت ءُ کشار بکنت . گوک ءَ ھنگور ءِ درچک پہ دنتان گوتک .آدم ءَ مُشتے آئی ءِ دپ ءَ جتءُ گوک ءِ دنتان گونڈ بوت انت کہ ھچ چیزے پہ دنتان گوتک کت مکنت الاّ پہ زبان.گوک ءَ گریت ءُ چہ آئی ءِ چماں ارس ھولمب بوت . جبرائیل ءَ گوں آدم ءَ گوشت پہ ھنگور ءِ درچک ءَ دلگران مہ بو کہ سال پہ سال ءَ رُدیت ءُ سبز بیت ءُ ھمک سال ءِ سر ءَ شاھلانی سر ءَ بچن انت شرّتر سبز بیت ءُ گیشتر بر ءُ نیبگ دَ نت . عجائب المخلوکات

انگریز ءِ دکترانی پتءُ پول ءِ متابک ءَ آ گوش انت ھما مردم کہ زند اش چہ پنجاہ سال ءَ بُرز انت اگاں ھر روچ یک گلاسے سھرین شراب بور انت پہ دل ءَ سک شرّ انت ءُ آیانی عمر دراج تر بیت.ءُ اے روچاں گوش انت دو مزنیں گلاس بیر (آپجو) ھم سھریں شراب ءِ ھمدرور انت البت پہپیرینانایران ءَ سرزاھری ءَ ترنداپ ءِ ورگ جرم انت ءُ شراب ءِ بھا سکّ گران انت کہ تھنا زرّدار پہ چیرکائی ور انت ءُ بازیں شیعہ ملا ھم پہ چیرکائی بلکیں ورانت . بلے ھیروئین ءُ تریاک ءُ چرس سرزاھر ءَ بھا بیت ءُ کیمت چہ سیگا ر ءَ ارزان تر انت .ملا چہ تریاکیاں ھچ نترس انت بلے چہ ترنداپیاں سکّ ترس انت

ھما مردم کہ پہ ستک دل نماز کن انت ءُ چہ بازیں سجد ہ ءَ آیانی انچگ ءَ گِردیں ٹِکّ چاپ جنگ ءَ انت آ ھم پہ شراب ءَ انچو وت ءَ دلسیاہ کنگ ءَ انت کہ جنت ّءَ شراب بہ ور انت ءُ جنتی حور ءُ گِلمانان گور امبازبکن انت .پہ منی ءُ خیاّم ءِ گمان ءَ آ بزگّ مپت کلّہّ زین وتی وھد ءَ ناسینگ ءُ وتی تاسپیں انیچگ داگ دیگ ءَ انت ,دوزہ ءُ جنتّ دروگے ءُ ٹگیّں ملا آیان ءَ رد دیگ ءَ انت
یک زمانگے من جی آر ملا ءِ دیوان ءَ نشتگ اتان آ واجہ ءَ گوشت : من شراب ءَ پہ اے ھاتر ءَ وراں اگاں آ دنیا ءَ جنتّی بوتاں اے دنیا ءُ آ دنیا ءِ شراب پرک ءَ چاراں کہ کتام وشتر انت ءُ اگاں دوزھی بوتاں پرچا وت ءَ اے دنیا ءَ چہ شراب ءَ زبھر ءُ ناکام بکناں

اشکنگ ءَ جی آر ملا ءُ علی عیسی باتیل ءِکوہ ءِ سر ءَ چہ پٹ پٹ ءِ سر ءَ کپتگ انت . علی ءَ بھکے نبوتگ ءُ جی آر ملآ ءِ مگون درشتگ ءُ دکتراں دوا درمان کتگ ءُ پلاتینے آئی ءِ مگون ءَ مان داتگ . امیت انت بلوچانی آشوبی شائر گیشتر زندگ با ت

علی رئیسی