ما پہ بلوچی ءَ زاناں کُجام زَھم جَتَگ کہ کسے مئے ھال ءَ بہ گیپت"

ما پہ بلوچی ءَ زاناں کُجام زَھم جَتَگ کہ کسے مئے ھال ءَ بہ گیپت"
نبشتہ کار: اسحاق خاموش

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
دوشی کہ"برزخ"ءِ "گُڈّی دانک"ءَواجہ محمد بیگ بیگلءِ ھمے لہتے کِشکاں وانگ ءَ اِتاں " ۔۔۔۔۔ منی دپ ماں ھاکاں بات اگاں بہ گُشاں کہ ھمے زیتّاں منی اے دِلبر لڈّگ ءُ رؤگی اِنت۔ایشی ءِ سبب اِش اِنت کہ چہ اِشاں گیشتر ءَ انگت دُنیا پہ الکاپی نہ دیستگ۔کودک انگت ماں وتی موج مستیان اَنت، لہتے ءِ جوازِ سفر ھم تیار نہ اِنت۔لہتے ءَ ویزہ نیست۔لہتے گوں امیگریشن ءِ واکداراں کشّ ءُ چیلّ اِنتءُ لہتے انچیں ھم اَست کہ کہ چہ وتی چاگرد ءَ پہک بے سار ءُ واب اِنت۔پمیشکا منی دُعا اِنت کہ ھاوند اِشانی ملوکیں سراں نگاہ دارات۔تنکہ منی ھمے چمروک پہ ماتین زُبان ءُ وتی سر ڈگار ءِ پہازگ ءُ دیمپانی ءَ گیش چہ گیش کار کُت بہ کن اَنت۔البت منی ھبر دگہ وڑ اِنت شُگر اِنت ھاوند ءِ کہ من جواز، سفر ، ویزہ ، ٹِکس ءُ امیگریشن ءِ کُلـیں جنجال گْوازینتگ اَنتءُ اے وھدی ماں ڈپارچر لاؤنج ءَ پہ کرار نشتگاں۔۔۔۔"(برزخ ، محمد بیگ بیگل۔تاکدیم 8چاپ 2012، بلوچی اکیڈمی کوئٹہ)۔۔۔۔ مُردنی ایں ھما دمان ءَمنی چمّانی اَرس شیپ گیپت اَنت کہ ھما ہاں کہ وتی زِند پہ بلوچی زُبان ءُ لبزانک ءَ نْدر کُتگ مرچی لوگءِ کُنجے ءَ کپتگ اَنت ءُ بے وسی ءِ مانگیشّتگیں بندیک ءَ گیشّینگ ءِ جُہد ءَ اَنت۔
مرچی منی بْرات گونگیں سنگت ظفر اکبرؔ کہ منی چارگ ءَ اَتک ۔۔۔ من وت ءَ گیشتر ملامت کُت کہ اے تیز رواجیں وھد ءَ مارا اَنچو گوں وتءَ مانگیشّینتگ کہ ما کسّی ھیال ءَ ھم نہ ایں۔کئے کُجام ھال ءَ اِنت کسّ کسّی نہ اِنت۔۔۔۔۔۔۔ چونیں مھشرے
بیگاہ ءِ وھد ءَ من ءُ ظفر سر گِپتیں کہ رؤئیں واجہ بیگ ءَ گِندیں ۔۔۔۔۔کِساس سئے ماہ بُوتگ اَت کہ من واجہ بیگل نہ دیستگ اَت۔۔۔۔آ، بری کہ من دیستگ اَت ھم وتی نادْراہی ءُ چمّانی نزّور ترّگ ءِ زنگ ئےِ جتگ اَت۔
من ءُ ظفر کہ چہ نوکیں لین ءِ دمکاں سر جنان سِنگولین ءِ نزّیک ءِ دمک ءَ سر کش اِت منی دیما " براہوئی ہوٹل "(چھچی ہوٹل ) اَت ۔۔۔ اناگہ تْرانگ ءَ کپتاں ۔۔۔۔۔۔۔ اصغر علی آزگؔ اوں من دیریں نہ دیستگ ۔۔۔ " " "ظفر ! من ءُ آزگ مدام ھمے ہوٹل ءَ نشتگ ایں ، چاہ وارتگ ءُ لبزانکی پُوتاری ھم کُتگ۔۔۔۔ ""
من وتی چمّ ہوٹل ءِ دیم ءِ کُرسیانی سرا شوہازگ پرمات اَت بلئے آزگ زاھر نہ اَت۔ "" ” یار ! مرچی آزگ گندگ نہ بیت “
منی چمّاں شوھازگ ءِ رھسراں سرے جت ءُ پد ءَ واترّ اِتنت۔
دمانے ءَ پد من ءُ ظفر اکبرؔ ھشت چوک ءَ بسم اللہ ءِ ہوٹل ءِ کش ءِ دمکاں سر بُوتگ اتیں ۔۔۔۔ دیم پہ دیم ءَ دیوال ءِ سرا تختی ءِ سرا نبشتہ اَت ۔۔ " محمد بیگ بیگل ہاؤس نمبر 215"
ما راستی کش ءَ تاب کُت ءُ دروازگے ءِ گھنٹی زٗور پِر دات۔ دمانے ءَ پد چُکّے در اَتک ۔
من جُست کُت " واجہ ھمدا اِنت؟" " ھؤ"
من کاگدکے ءِ سرا نبشتہ کُت ءُ چُکّءِ دستءَ دات ٘ واجہ ترا گِندگ لُوٹیں ۔۔۔۔۔۔ تئی کستر اِسحاق خاموشؔ"
دمانے ءَ پد دگہ گْونڈویے اتک "ابّا گُشی بُرزا بیائے"
من ءُ ظفرؔچہ پدانکاں بُرز ءَ سرکپان بُوتیں ۔۔۔۔ دروازگے پچ اَت ۔ من دروازگ ٹُکّ اِت۔ " تہا بیا اِت" چہ تہا جنین آدمے ءِ تواراَت۔
ما کہ لوگ ءِ تہا پُترتیں دیم پہ دیم جنیادم ے نشتگ اَت ءُ کش ءِ کُوٹی ءِ دپ ءَ واجہ بیگل ءِ جنین زھگ آئی ءَ کوپگ دیان اَت ءُ کُوٹی ءَ برگ اَت ۔۔۔ اے بیگ صاحب ءِ مہر اَت ۔۔۔۔ کہ نزورءُ نا توان اَت بلئے مارا دِلپروش ئےِ نہ کُت واترّئےِ نہ کُت۔
دمانے ءَ پد واجہ بیگل منی ءُ ظفر اکبرءِ دیم پہ دیم ءَ نشتگ اَت۔۔۔ منی ھیال ءَ گُشئے علم ءُ زانت ءِ چمّگ ءئےِ سر رِچان اَتءُ مئے بالاد ءَ وشنود کنان اَت۔
"شُمئے مہربانی کہ شُما وھد کشّ اِتگ ءُ منی چارگ ءَ اتکگ اِت" بیگ ءَ درّائینت۔
" انّا واجہ ۔۔۔۔۔۔۔ اے مئے پیمیں نابُودیں نودربرانی فرض اِنت شُمئے ھالگیری کَنگ۔۔شُما بلوچی زُبان ءُ لبزانک ءِ کوھیں کلات اِت" من پشل ءَ پشل ءَگُشت۔
واجہ بیگل ءَ سرجاہ ءِ سرا تِکّہ داتگ اَت منی نیمگ ءَ چَکّے ئے ترّینت ءُ گُشت ئےِ۔۔۔۔" ما پہ بلوچی ءَ زاناں کُجام زَھم جَتَگ کہ کسے مئے ھال ءَ بہ گیپت"۔۔۔ گُشئے جمبیائے منی دِل ءَ مِکّ بُوت۔۔۔۔ اے یک بلاھیں گِلگے اَت پہ وتی چاگرد ءَ ۔۔۔۔۔۔۔۔۔۔۔۔۔ شہماتے اَت پہ راجی سروکاں ۔۔۔۔۔۔۔۔ دلپروشی یے اَت پہ مئے پیمیں نودربراں ۔۔۔۔۔۔۔۔۔۔۔۔۔۔
"واجہ مئے بلوچی زُبان ءِ شاعری ، آزمانک ءُ انچیں سساساچ پرچہ دِگہ زبانانی تہا رجانک کنَگ نہ بنت؟"
بازیں جُستاں پد منی گُمان ءُ ھیال ءِ پردگاں اے دیم ،اے جُست ءَ سر کشّ اِت۔
" مئے مردُم ارزانی ءَ نام لوٹ اَنت ءُ اے بلاھیں کارے اے کار ءَ ہرکس کُت نہ کنت۔۔۔ وھد ءُ دِل سِتکی دوئیں لوٹ ایت۔
ساھتے ءِ نیاد ءَ کرنے ءِ تاھیر دات ءُ من ءُ ظفر اکبر ءَ وتی راہ گِپت۔
"یکبرے پدا آزگ ءِ ٹھکانہ ءَ سرے جنیں"
من ظفر ھال دات۔ غریب شاہ ءَ ندیم لاشاریؔ دُچارکپت۔۔۔۔ ندیم ءَ مارا تاں آزگؔ ءِ دروازگءِ دپ ءَ سر کُت۔
دمانے ءَ پد من ، ظفر اکبرؔ، اصغرعلی آزگؔ، سلیمان رئیسی ءُ ندیم لاشاری براہوئی ہوٹل ءِ دیم ءَ چاہ واری ءَ اِتیں۔منظور دلجمؔ ھما وھدی ھوار بُوت کہ من ءُ ظفر پاد آھگی اِتیں ۔۔۔۔۔۔۔۔
اصغر علی آزگ ؔ شاعری ھم کنگ ءَ اِنت ۔۔۔۔۔۔ آزمانک ھم نویسگ ءَ اِنت ۔۔۔۔۔۔۔ کتاب ھم چھاپگ ءَ اِنت۔۔۔۔ دیما روان اِنت۔۔۔۔۔ جُنزان اِنت ۔۔۔۔۔۔۔ " آھاں ھشت ماہ ءَ فتح نظر ءِ کتاب داشت چھاپ نہ کُت ۔۔۔ باز ارزشت داریں کتابے ۔۔۔ موسیقی ءِ سرا چوشیں کتاب انگت چھاپ نہ بُوتگ ۔۔۔۔۔۔ پدا من گتر ءِ سنگتاں گُشت آھاں کتاب ءِ چاپگ ءَ کُمک کُت ۔۔۔۔۔۔۔۔۔۔ " آزگ گپّ ءَاَت۔۔۔ " من انّوں شعری دپتر ءِ چاپ کنگ ءِ تیاری آں ۔۔۔ سنگت گُش اَنت تو دگرانی کتاباں چھاپ کن ئے تئی وتی کتاب کدی چھاپ بیت ۔۔۔۔۔من گُشاں بابا زرّ نیست من چہ کُجا وتی کتاب ءَ چھاپ کناں ۔۔۔۔ حالانکہ منی نگد ءِ کتاب اوں تیار اِنت۔۔۔۔"
سلیمان رئیسی وتی نوکتریں نبشتانکانی باروا گپّ اَت۔
من ءُظفر ءَ پاد آھگی اَت کہ مارا واجہ ظفر علی ظفر اوں گندگی اَت۔
کُہنیں گولیمار ءِ شریش ءِ چیر ءِ ہوٹل ءَ ظفر علی ظفرؔ چہ من ءُ ظفر ءَ پیسر نشتگ اَت ءُ وداریگ اَت۔
جی آرمُلّا، بشیر بیدار، قاضیؔ، زیمی ، بیگل ءُ اے دگہ بلوچی ءِ نامداریں شاعر ءُ نبشتہ کارانی کِسّہ، طارق روڈءِ فلیٹ کہ لبزانکی سنگتانی بُنجاہ اَت آئی ءِ کسّہ۔۔۔۔ شاعرانی بچکندی کسّہ ۔۔۔۔۔ زُبان ءُ لبزانک ءِ جیڑہ ءِ کسّہاں پد من پدا ھما جُست کُت۔"واجہ مئے بلوچی زُبان ءِ شاعری ، آزمانک ءُ انچیں سساساچ پرچہ دِگہ زبانانی تہا رجانک کنَگ نہ بنت؟"
"مئے کرّا مستریں جیڑہ لاپ ءِجیڑہ اِنت آسراتی نیست ۔۔۔۔۔۔۔۔۔۔ شاعر ءُ نبشتہ کار لاپ ءِ غم ءَ بکنت یا زُبان ءُ لبزانک ءِ باروا بہ جیڑ اِیت ۔۔۔۔۔۔؟ من ٹی وی ءِ واستہ ڈرامہے نبشتہ کُت ۔۔۔۔۔۔ منی زرّ اِش وارت اَنت ۔۔۔ ذی نیشنل بُک فاؤندیشن ءِ مراگشے ءَ لوٹائینتگ ات اش ۔۔۔ دیر ءَ گیش ّ اتاں ۔۔ رکشہ ءَ دو سری زرّ داتگ بلئے کسّ نیار ایت گولیمارءَ ۔۔۔۔۔۔۔۔۔۔ دگراں بِل مئے وتیگ مراگش ٹہین اَنت گُشی بس ءَ بیا اِت گوں ۔۔۔۔۔۔۔۔۔ من اے بری نہ شُتاں من تہنا اِتاں ۔۔۔۔۔۔ چار اِت کہ کؤرے آپ بکنت یا بس ھراب بہ بیت راہ ءَ گُڑا من وَ بزّ گ باں ۔۔۔۔ من نہ شُتاں اے رندی ۔۔۔۔۔ "
ظفر علی ظفر ؔ گپ ءَ اَت ءُ من دِل ءَ جیڑگ ءَ اِتاں۔۔۔۔
؎ کپوتاں پہ دل ءِ زیماں بہ چار اِت
زھیری نالگاں سہتے بہ دار اِت
شلیناں تْرونگلیں اَرساں اِد ءَ من
زِری نوداں دِگہ دیمے بُگْوار اِت
تْرھیناں غم جتیں ڈیل ءَ دمانے
چہ کئیپاں کدّھیں پُرّیں بْیار اِت
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔٭