منی وتن ترا سلام !

منی وتن ترا سلام !

میر گل خان نصیر

منی ته ، جی و جان توئے 

منی دوئیں جهان توئے

منی نما و شان توئے

منی گلیں نشان توئے

               منی تو بیتگ ئے مدام

               منی وَتــَن تـــرا سلام

توئے چو ماه ءَ روژنا

توئے چو ساه ءَ دوست منا

توئے مئے راه ءِ رهنما

توئے پناه ءَ ، مئے بن ءَ

            توئے مئے نان و آپ و تام

            منی وَتــَن تـــرا سلام

تئی درئچگ و جَرّ و دار

تئی ڈنّ و دشت و کوهسار

په مــن بهشت و ملگزار

پمن چو ساه ءَ ، تئی کِشار

               تئی نما ءِ ، من گلام

              منی وَتــَن تـــرا سلام

تئی دیم ءِ برئمش و دلبری

نه انتی مَـٹ و هـمـسـری

ترپنت تئی ریک،زرزری

منا تو دوست ئے ،مادری

               توئے مئے آبرو و نام

               منی وَتــَن تـــرا سلام

مروچی تهارمَگِنت جهان

ســر ءَ پُــرشته ، آزمان

گروک و گرئندنت سرشمان

سُچیت جگر،مُجنت گمان

            مدام نت گوں تو هوش و پهام

             منی وَتــَن تـــرا سلام

تئی په نام ءِ دارگ ءَ 

تــئــی نـمـا ءِ آرگ ءَ

سراں دیوں پتارگ ءَ

مَں هون و هید ءِ گوارگ ءَ

               ما، ندر بوں ، تئی په نام

               

               منی وَتــَن تـــرا سلام

چه پُشت و پُشت و گیریاں 

سـتــا کـُـتـه مَـهـیـریـاں

تئی یلاں و بیریاں

گرانیں اگهده زیریاں

                توئے دپ ءَ مئئ سُهب و شام

                منی وَتــَن تـــرا سلام

تو مادرئے مئے ، ماهلیں

ما پُسگوں تئی یلیں

گوں مال و جان ءَ جاپلیں

کنوں تئی ننگ ءَ هارملیں

                  نه کِلـّوں ما ، ترا گلام

                 

                  منی وَتــَن تـــرا سلام

ببات ئے سبز و شادمان

گوں ناز و داب و دمدمان

ابد - ابد ، زمان - زمان

ببات ئے امن و ماں امان

                گوئشیت نصیر وَش کلام

                منی وَتــَن تـــرا سلام

                       گل خان نصیر

                      ساهیوال ءِ جیل

                    1968 ءِ جولائی ءِ 3

                    ( کلیات نصیر - تاکدیم 614 و 615 )