سـَـــمـــــــیــــــــن

سـَـــمـــــــیــــــــن
             په وتی نازَلیں و شـَکـَلیں جـَـنِک سمین جان ءِ نام ءَ !

​گِـین ءِ بهر ءَ شکلیں سـاه پَـر تـرا ما شات باں
داں زَمانگ بیت و هست انت گوں ترا ما یات باں

پُلّ ! سَمین انت هَستیاں ماں بو و شَرّ رنگی زبان
ما وا « دپتان » مهردلیں جان ، زِر ءِ هُلّ ءِ زات باں

نیر ءِ دریا باں مَه اوژناگ ، هم تَهاریں ماں شپ ءَ
مَؤج ءَ باں من تَلوسوکیں، هستی په بُندات باں

تو وا شهرانی جَنِک ئے،ٹـَهل و سَد نازیں«سمین»
شـَـرتـریـں ساز ماں زمان ءَ ، مهر ترا من دات باں

تو جهان ءِ بو و رنگ ئے ، تو جهان ءِ زیب و ٹــاه
تو وا مـهـر ءِ مــارگ ئے و من چه تــو آبــات باں

نازلینیں تو جـَنِـک ئے شَکلیں هم شَـهد تـَبیں
هم گـُـلانی پَهر بات ئے ، من په تو سَوگات باں

تئی کمال ءِ ندری آں من مهر و روچ ءِ بادشاه
تئی په بود ءَ من زراں و پر تو و « آزات » ءَ باں

دَؤر ءِ سَکّی گُں تئی جُهد زانت ءِ گوں آسان بیت
هم اُمیت ءِ توشگاں تئی هم گـُل ءِ زریات باں 

چـو پَری ءَ « انجلیچکا » تئی په نازانی بَر ءَ
پر امیتیں مات انت دوستیں ما وا «نور»ءِ زات باں

« تـَهل » چو جَؤرانی وا تام انت بینَگ ءِ مَٹ و بدل
من تئی زند ءِ همک روچ ، وشّیانی پات باں

                                                         کریم بلوچ _ تـَهل
                                                              12/04/08

                  ماسکو - ارس 

* - آزات ؛ سمین ءِ برات ءِ نام انت .
** - انجلیکا ولادیمیرونا ؛ چکانی مات ءِ نام انت .
*** - نور ؛ کدخدا نورمحمد ، چکانی پیرک ءِ نام انت