بیرکِریں بالاچ ءِ گوانک !

بیرکِریں بالاچ ءِ گوانک !

****************

کوه و شهر میری مئی کلاتاں انت

بالاچ چو گوانک انت په براتاں انت

تیاب و زر هم مئی هستی ءِ مال انت

هر کجام هَند ءَ میر بلوچ گال انت

پٹ مئی دلبند چو پراه انت چو

چو سَمین ءَ بنت روچے هم آجو

اے مئی ساه ءِ ساهی ءِ هَند انت

په بلوچاں اے چُش که دلبند انت

سَد سلام مِهرانی تیاب و زر

تِیهـُریں کوهانی شپ گِریں گواتگر

سَد سلام ماتی کوچگ و آپبند

لک نماهانی دلبر انت سوگند

سَد سلام « نورا »و یلیں « هَمّل»

سَد بَزیں رُمبانی سَر و سَرگلّ

سَد سلام میریں « دوست محمد هان »

« گَؤسی بیزنجو » و « ایسپ » ءِ جهداں

سد سلام « بی بی بانلی » هیریں

سد سلام « سُلطان هاتون » پل سیریں

سد سلام « مَه هاتون » زرابیں آس

سد سلام  « کریمه » دلجمیں الماس

سد سلام ماهیں مات گلام جان ءِ

سد سلام « بولان » ءَ و « دَپتان » ءِ

سد سلام « نوری » مئی نصیر هان ءَ

شه بلوچانی ، پَهر ءِ میدان ءَ

سد سلام میریں مئی « هلیل هان » ءَ

راج ءِ شهمیر و پُل شهیدان ءَ

سد سلام ماتانی گلیں شان ءَ

لک مرادانی واهگ ءِ جان ءَ

سد سلام « گل هان » راجی سر شائر

جهد تئی ماننت مئی گلیں هاتر

سد سلام مهر زاتیں « آکوب » جان

ٹـِک تواریں و پوه سریں انسان

سد سلام میریں مئی بلوچان ءَ

میر نهنگ « مهراب » و « لَوَنگ هان » ءَ

سد سلام میری کهچراں سبزیں

سد سلام ورنایاں زباد لبزیں

سد سلام بچاں ، نوک باهنداں

میر بلوچانی نوکیں پُشترَنداں

دِلجماں روچے انکلاب بیت انت

جَهجنئگ مردانی هِمت ءِ سیت انت

تاں که بیت آزات مئی بلوچستان

گلزمین گنجیں په گـَل و شاداں

کریم بلوچ ـ تــَـهــل

18.01.15

هارکپ . یو

******

 ٭ ـ نورا : نورالدین مینگل . مینگلانی سروک که انگریزی گوں وتی گوریلایی جنگاں باز تاوان دات و آهر ءَ گِرگ و شهید کنگ بیت .

* ـ همل جیند : کلمتیانی شیریں سرمچار که آئی جنگ گوں پرتگالاں نامدار انت و آهر ءَ پرتگالانی دست ءَ بندی و شهید بیت .

* ـ میر دوست محمد هان بارانزیی ، روکپتی بلوچستان ءِ بادشاه چه 1919 تاں 1928 ءَ . که رندا ایرانیانی گون ءَ په پندل ءَ تهران ءَ برگ و هموداں گوں وتی همراهے ءَ شهید کنئگ بیت .

* ـ گؤسی بیزنجو : میر غوث بکش بیزنجو که جهان ءَ نامدار انت و چه بلوچانی گهتریں رهدربراں وتی وهد ءَ زانگ بیت .

* ـ ایسپ : ایسپ عزیز مگسی . مگسیانی سرمچاریں سروک که بلوچ ءِ گهبودی و بلوچستان ءِ دیمرئی و آزاتی چه انگریز ءِ دست بازیں جهدی کت و 1935 ءَ ،کویٹه ءِ زمین چنڈ ءَ بیران بیت !

* ـ بی بی بانلی : میر چاکر هان رند ءِ گهار که باز شیوار و جنگی کماندارے بیتگ !

* سلطان هاتون :  شیریں سرمچار میر کمبر و نگدی ءِ ماس و سلیمان ءِ لوگبانک بوتگ که آئی ءِ کرد گوں میرکمبر ءِ سرمچاری هور و بندوک انت .

* ـ بی بی مَه هاتون : شیریں دادشاه ءِ شیر زالیں گهار ات . که مدام جنگاں گوں وتی براتاں هوار بوتگ .

* ـ بانک کریمه که واجه هـُدا آئیا هِدر ءِ زیند بدنت نوکیں دَؤر ءِ مئی جنیں آدمانی یکے چه گچینی گهاراں انت که آئی ءِ شیردلی چه هچ مردینے ءَ کم نهنت .

....

***