ناکو دلوش و نیوٹن ءِ نیاد و دیوان

ناکو دلوش و نیوٹن ءِ نیاد و دیوان 

کریم بلوچ _ تهل

ناکو دلوش : دروت و دراه بات ئے واجه نیوٹن !

نیوٹن : یا که بیایات ئے میریں کماش دلوش جان ! ترا دروت و دراهی بات . بیا هال کن که چون ئے واجه ؟

ناکو دلوش : من وَش و دراهاں . پیری وتی جاه ءَ !

نیوٹن : هئو پیری ءِ هبر دگر انت .

ناکو دلوش : تو مرچاں باز پگر کناں و منجائے واجه نیوٹن ! بارین هیر انت ! ؟

نیوٹن : جی واجه ، پیشی هپتگ ءَ من باگ ءَ شتاں . ترا باور نبیت که من چئے دیست !

ناکو دلوش : هیر انت بگوئش باریں ! منا چون باور مه بیت .

نیوٹن : من دیست که سوپے ڈگار ءَ کپت ...

ناکو دلوش : هئو واجه ، هنوں سوپانی موسم انت ، سوپ رستگ انت ، شپ انت و کپ انت اگں مه چنانش .

نیوٹن : من هیران بوتاں که سوپ پرچا ڈگار ءَ کپت و آزمان ءَ نه شت ! ...

ناکو دلوش : نگبهت سر تو چونیں هبر کن ئے ! شیتان ءَ هم سر پر نبیت ! سوپ زاناں ( دَنا ) مُرگے و بالی پر انت که آزمان ءَ بال کنت ؟ تئی پادانی چیرا کپتگ که تو آئیا به چن ئے و به وَرئے !

منی واجه منا سئے گیست و چار( 3 بیست و 4 ) سال انت ، من کدیں ندیستگ یا نه اشکتگ که سوپے آزمان ءَ بال کنت . گوئش انت سوپ وتی درچک ءِ چیرا کپیت . منی هیال ءَ ترا ملا پیشّ بُرّ ءِ کِرّا روگی انت  تاں ترا تائیتے بدنت .

نگبهت اگں سوپاں آزمان ءَ بال کتیں ما هاک وارتگ ات ؟...

نیوٹن : ناکو دلوش تو بس کن که منی سر گــَژّ اِت ...

ناکو دلوش : تئی سر چه منی هبراں گژ اِت ؟ اناں ؛ منی پت ، تو هنچیں هبر کن ئے که شیتان ءَ هم ، هندگ گِر ایت . نگبهت تئی سر سار انت ؟

                                                                 ٭٭٭٭٭٭٭٭٭٭٭٭٭٭٭٭٭٭