ماهکان ءِ سوک

ماهکان ءِ  سوک

ماه ءِ ارس ،
         ترا گِنداں
و مَهکان ءِ من لرزوکیں لـُـنٹ و ساهگ ءَ ،
بهار ءِ من نشار ءِ رنگ گاریناں
                  زمین ءِ کـَپتـَگیں بَـچّ و جَنِکانی
                                   پُرُشتگیں امیت هزاریناں !      


منی سوگی ایں همبل بیا !
منی تو سهتگیں زِردانی آس ئے آس
ترا من زیملے باں
            جان ءِ اوتاکاں ،
دل ءِ بنداں گوں بنداں
             کـَـلات ءِ پَئیم تئی  ِزیْمَـل
من و تو زیملاں ننداں


ترا من زیملے بنداں ،
           چه مهر و دوستی ءِ گالاں
چه بـِچکـَـند و اُمیتاں ، زند رودیناں
من و تو هور و یکجاه ، بانزلیں بالاں
چه سُهتگیں پُهـلاں سَر گـُـوَز باں
ترا !
        من پَـٹ و کوهاں ماں ،
                  هزار چم گوں ، ندارگ باں
تئی نَنگار ءِ پَد رَند ءِ بَدَل
                 بُمب ءِ نشان پرچا ؟!

منی سوگی ایں همبل بیا !
              ترا من زیملے بنداں
هزاراں گال گچینی گوں
         بهار ءِ رنگ گوں رنگیناں
                      تئی باندات ءِ باندات ءَ
چه مهر و گلزمین و زند
            _ سَبزیناں ؛
           ترا چه کوه بن ءِ ، من چمگاں
                 سَرد آپ تِنگیناں
و مهر ءِ چه کِشار ءِ نیبگاں ،
              بُـود و ، امیت پَکـّـیں واریناں !


ماه ءِ ارس !
          ترا گنداں
منی بیلی ، دل ءِ من لـَرزگاں زاناں  ،
که
بے گالیں مودگاں سک انت...
هزارگنجیں چو منی مات و منی پت هم
                              دران ڈیهی چه من سست انت ...!


منی همبل !
 تئی ارساں ، بهار انت لیمر انت پرچا
بیا سهر پلے ءَ
             پَٹے ماں بے آپیں
لـَواراں گیمراں بیت چه ...


بیا ماتانی نازینکاں
پَدا ما چادراں بنداں
بیا که گلزمین ءَ ما وتی مهر ءِ سَپَر _ سفر _ زوراں
بیا که ماهکان ءَ ما وتی هر پَٹ ءِ مهمانی
                        _  پدا لوٹــاں
بیا که ما و مَهکان ،
                شاده ءِ دیوان ءَ یکجاه باں ...


                                                                کریم بلوچ _ تهل                                                                   30/05/09