« پهره روتاک » « روزنامه پهره »
ادبیات بلوچ« پهره روتاک » « روزنامه پهره »
ادبیات بلوچســـــــــوپ
ســـــــــوپ
زردبهار و تاکریچ ءِ گڈی وهد ات . درچکانی تاک دیر ات که شـَـپتگ و رهتگ اتنت . تهنا کوهی سوپے ءِ بُلک ءَ یک و تهنا یک دانگے سوپ پَشت کپتگ و لونج ات . ماں همے وهد ءَ کرگوشک تچاں و چه هموداں گوئزان ات که سوپی دیست .
نوں چوں آئیا بسندیت ؟ سوپ وا سک برز لونج ات ؛ تاں آئیا سِٹ کنئگ نبیت !
_ کَ رررکَ ررر!
کرگوشک توار ءِ نیمگ ءَ چارست . دیستی که گوراگے گزے ( کرسمس ءِ درچک ) ءِ سرا نشتگ و چارستی .
_ اَو گوراگ ! _ کرگوشک توار کت ._ آ سوپ ءَ پر من بسند !
گوراگ چه گز بال کت و سوپ ءِ درچک ءَ نِست ( نِشت ) و سوپی سِست . وتی سُنٹی داشت نکت و سوپ جهل کپت .
_ منتواراں تئی گوراگ ! _ کرگوشک گوئشت و لوٹستی که سوپ ءَ چست بکنت ، بلے سوپ ءَ گوئشے ساه مان ، اناگت پوشگی جت و ... جست ( تتک )۔۔۔
چے بوتگ باریں ؟
هرگوشک ( کرگوشک ) گــُـڑست ، پدا سرپد بوت : سوپ سیده و سرراست دَجک ءِ سرا کپتگ ات ، پَرشی که دجک وتا هموداں گلڑ کرتگ و سوپ ءِ بُن ءَ وپتگ ات . دجک که چه واب ءَ جهسِرِ اِت ، سِٹی کت و تچاں بوت و سوپ هم همائی ءِ کنٹکاں بند گپتگ ات .
_ بوشت ، دجک بوشت ( بوست : به اوست ) ! _کرگوشک توار کنان ات . _ تو کجا منی سوپ ءَ برگ ئے ؟
دجک اوستات و گوئشتی :
_ اے منی جند ءِ سوپ انت . آ کپت و من آئیا گِپت .
هرگوشک ، دجک ءَ رَسینت :
_ هنوں منی سوپ ءَ بدئے ! من آئیا ودی کرته !
گوراگ هم ، وتا سر کت .
_ شما ویل جنگیت _ گوئشتی ، _ اے منی سوپ انت . من پر وت سستگ .
هچ کس آدگر ءِ هبر ءِ مَـنـّـئگ ءَ تیار نهت . هرکس پر وت کوکار کرت :
_ اے منی سوپ انت !
اشانی گــَلـگـَـجه ( جاک و کوکار) سرجمیں جنگل پرشتگ ات . و هنوں اشانی جنگ بنگیج بوتگ ات : گوراگ ، دجک ءِ پونز ءَ چونگ چنان ات ، دجک ، کرگوشک ءَ کٹتکاں مان بست و کرگوشک ، گوراگ ءَ لگت جنان ات ...
همدان ات که مم ودی بوت . سَـکـّی گــُرّ اِت و گوئشتی :
_ چے کنئگ ایت ؟ شمئی جاک و جنگ چئے ءِ سر انت ؟
پهکاں آئیا گوئشت :
_ مزاربیمیں مم ! جنگل ءَ تو چه دُرُستاں مَستر ئے ، تو چه پهکاں زانتکارترئے . تو مئی شر ءَ په راستی بگیشیں ۔ اے سوپ کئیگ انت ؟ تو بگوئش !
و مم ءَ سرجمیں گپاں گوئشاں بوت انت که چے بوته . مم پگر کت و پگر کت و وتی گوش بُنی هارینت و گوئشتی :
_ کئے سوپ ءَ ودی کت ؟
کرگوشک گوئشت : _ مـُـن !
_ کئے سوپ ءَ سِست ؟
گوراگ کوارّ اِت و گوئشتی : _ مـُـن !
_ جوان انت . کئے سوپ ءَ گِپت ؟
دجُک پیسکگے کت و گوئشتی : _ مـُـن !
_ نوں گوش کنئیت _ مم شر ءَ جناں بیت . _ شما پهک راست گوئشیت و اے هساب ءَ شما پهک سوپ ءِ هکدار ایت ...
_ بلے اداں سوپ وا یکے ! _ یک توار دجک ، کرگوشک و گوراگ هوری ءَ گوئشت .
_ سوپ ءَ وتی نیام ءَ بهر کنیت و هر کس وتی بهر ءَ بوارت .
سئیں هوری ءَ سارتیں گینے کش ات و یکتوار گوئشت اش :
_ چوں ما پیش ءَ همے پگر ءَ نکتگ !
دجک سوپ ءَ زرت و چار بهری کرت .
یکینی دات کرگوشک ءَ و گوئشتی :
_ کرگوشک اے تئیگ انت ، - تو اول سوپ ءَ دیست .
دومی چنڈی ، گوراگ ءَ دات :
_ گوراگ اے تئیگ انت ، - تو سوپ ءَ سِست .
سیمی بهرءَ دجک وت وتی دپ ءَ کت و گوئشتی :
_ اے منیگ انت ، پرشی ( پرچا ) که من سوپ ءَ گِپت .
چارمی بهری ، مم ءِ دست ءَ دات و گوئشتی :
_ مزاریں مم ، اے تئیگ انت ...
_ پرچے ( پرچا ) منی ؟ - مم هیران بوت !
_ پرشی که تو مئی شر ءَ جت و ما را تو سُهل دات و ما را تو زانت و زانتکاری سوج دات !
هر یکے وتی سوپ ءِ بهر ءَ وارت و پهک وش اتنت . پرچا که مم آهانی شر ءَ په راستی و په براتی جتگ ات و هچ کسی دلرنج نکرتگ ات .
Яблоко. Сказки и картинки Владимира Григорьевича Сутеева ٭٭٭٭٭٭٭٭٭٭٭٭٭٭٭
