پرچا سست اوپار

پرچا سست اوپار

کئى آس ءَ جهان سهتگ چو نیزگار
چیا رسم انت گریبانى کُش  و  دار
چیا نالنت کپوت  ماں  بند  و  دام ءَ
چیا هژم ءَ جش انت ملا و بوتار
چیا بند انت دپ و دل ماں زراب انت
چیا بے پردگ انت زندانى بامسار
چیا شد مسترى راج انت په تقدیر

چیا نازانى نپس ءَ نشتگ سرکار
چیا ساه انت گٹ گیرانى دست ءَ
زبان برٌانى دَؤر انت، جاهلیں مار
چیا آزاتـــى ءِ لــؤز انت دران ڈیه
چیا ڈیه ءِ هبر ، بند انت و سد دار
چیا هَــزم انت راجانى چـو لیلام
چیا زهگ و جن و چک انت رهچار
چیا ازت چه ڈیه ءَ   لڈ  و  بار کرت
چیا بیم گپتگ مرچى شهر و بازار
چیا نازانتیانی پل انت سَــک  بـَر
چیا واننده جیل ءَ بند  و  زانتکار
چیا جاندم چو آساں انت گلیں ڈیه
چیا هوناں مئى چوشنت هزگار
شهیدانى وا راج انت بے سر و بن
امیت انت سهتگیں و گین و گینمار
کشار انت میزریں ترسانى آماچ
رمگ بمباں چرتگ ، زُلـٌــین ناهار
مروچ شهرانى برزیں ماڑى انت جیل
کچک هم رسترى بیم انت و ره گار
مروچ رژن ءِ جلشک ءَ واجه لرز انت
مروچ دیوان دت و دیه انت و هپتار 

 

                    ***
بیا ٹکیں هبر گوں تو گوشاں میر
بلوچ راج ءِ وس ءَ درد انت گوشدار
نه منت انت گوستگیں نوشر و محمود
نه ملا، سانڈ ، نئیکه پئوجیں هون وار
گجر چک چین وت بیت انت و پد نیں
نه ماننـــت هچ هم مـــلاى ءِ بستار
گوزنت دَؤر سَکٌى ءِ   هٹــلر ءِ راج ءِ
سباه ٹک دنت په راج آجوئى ءِ  وار
مـــروچى زانت ءِ جمبر آ‍زمان انت
دلاں روک انت ، امیتانى چراگ سار
مروچى گرک جتگ مئى واهگ ءِ پل
چو کواسانى دست انت ، ند و کاٹار
مـــروچ زانــتانى بیــــرک روژنا انت
مروچ آزاتى انت مئى راج ءِ جشتار
په راج ءِ رژن ءِ باندات ءَ زروک انت
زمانگ گوشتگ ات اے پنت شیوار :
ستر زوراک به بنت هم گرک و روباه
نه جل انت هم زمان و وهد ءِ رپتار
نه ارزان انت په کس سولیں شهید هون
نه پاداں داشت کنت آشوب ءِ گواجار.

پدا" نورى" مزار هے هے کنان انت
یل و بیلاں دراه  ،  راجانى گم وار
بیا سانگ انت شمئى او راج ءِ همبل
کج انت بیرک ، کج انت لجانى پادار
پدا " میر کمبر"  ءِ  دَؤر انت ورنا
پدا ماتانى    نازینک   انت   ترا  یار
پدا زانت ءِ چراگ ، بیرک شمئى بات
پدا ره نـــوک و پر تو ، بام ءِ استار
پدا سوبانى روچ و شاده ءِ  روچ
هزار استار ءِ برانز بنت سینگار
هبر "تهل" انت په سرزوراں و بد کرد
همے راست که گریب ءِ سست اوپار

   کریم بلوچ _ تهل