روبـــــــــاه

روبـــــــــاه

                                                                             **********

الکسی ٹالستوی/ کریم بلوچ ــ تــهــل

      سـَــؤلے ءِ چیر ءَ ، روباهے وَپـتگ ات و وتی دُزّیانی وابی دیست !

      روباه اگں واب ات یاں آگه ، سرجمیں سَهداراں چه آئیا ازاب اتنت .

       جنگل ءَ دَجک ، دارکٹ ( دارتل ) و گوراگ په روباه ءِ جـَـنــَـگ ءَ هور و تیار بوت انت و سرگپت انت . گوراگ و دارتل دیما بال کت و شت انت ؛ ودجک آهانی رند ءَ روان بوت .

        گوراگ و دارتل سَؤل ءِ سرا نشت انت .

        _  ٹــووکّ ، ٹـــووکّ ، ٹـــووکّ . ــ دارتل سَؤل ءِ درچک ءَ سُنٹ جناں بیت .

        و روباه واب گندان ات : نترس و شیریں مردکے ، گوں وتی مزنیں تپر ءَ آئیا نشانگ کتگ ات .

       دجک ، سَؤل ءِ نیمگ ءَ تچان ءَ پیداگ ات و گوراگ آئیا گوانک جنان ات :

       _ کوارّ دَجُک ... ! کوارّ دَجک ....!

       « کــُــکــُــڑ ءِ وروک ، ککڑ ءِ وروک  »، ــ روباه اشکنگ ات که شِرّیں مردک آئیا گوئشان ات .

       دجک ءِ رند ءَ ، آئی ءِ لوگی و چکاں هوار تچاں اتنت ؛ هـَس و پوس لیٹ وراں یایاں اتنت .

       _ کوارّ دجکاں ....!  ــ گوراگ کوارّگ و گوانک جنان ات .

      « گِر ات و دِرنجتی » روباه ءِ گوشاں هما شیربیمین مرد ءِ گپ اتنت که اشکنگ ات . چو روباه گــُـڑست و چه واب جَهسِرت . دجکاں اے وهد هموداں رستگ اتنت و آئی ءِ پونز ءَ ڈنگر جناں بیت انت ! گوں آئی ءِ جهسرگ ، پونزی چه دجکانی کنٹکاں گیشتر ٹـنـگ ٹـنـگ بوت .

       _ منی پونز اش بُرّ اِت، منی مَؤت رَستگ ، ــ و روباه چشگے جت و چه اودات جـِست و تتک .

       گوراگ و دارتل آئیا پررتک انت و آئی ءِ سرگ ءَ سُنٹ جناں بیت انت و گوراگ کوارگ ات : « کوارّ ...»

      کشوک و بے مارشتیں روباه اش چو گلینت .

      چه هما روچیں دیم په اینگو ، روباه هم جنگل ءِ روگ و هم چه جنگل ءَ دزی کنگ ءَ بس کت !

                                 ****************