پرچا موداں اسپیت و ریشاں سیاه انت !

چیر و اندریں کوٹی     یا 

                        پرچا موداں اسپیت و ریشاں سیاه انت !

                              ( رودرآتکی  آزمانک )

ایزابل پینکنشتادت / کریم بلوچ - تهل

        یگبرے بادشاهے پـَـٹ و گیاواناں روان ات . اناگت ءَ آئیا هَیرانی مردمے دیست .

         بادشاه پول کت : - پرچا تئی مود اسپیت و تئی ریش سیاه انت ؟

         هیرانی مرد پسو دات : - پرشی که منی مود باز پیسرتر چه منی  ریش رُستگ انت .

         بادشاه چه جواب ءَ وَش و هیران بوت . نوں بلے مردی پرمات :

         - تو تاں که منی دیم ات نود و نه رند ندیستگ ، پیکه پسوے که من ات گوئشتگ ، کس ءَ مگوئش ئے .

         بادشاه وهدے که وتی کلات ءَ برگشت ، وتی وزیری توار کت و پول ئی کت :

        - پرچا مردم ءِ موداں پیش چه آهانی  ریشاں اسپیت بنت ؟

         وزیر پسو دات نکت . آ چشیں جستانی جواب ءِ زانگ ءَ کدیں جهد نکتگ ات . بلے آ هُژیارے ات . وزیر چه بادشاه ءِ یکے چه گــُـلاماں پول کت : بادشاه په سَئیل و سواد ءَ مرچی کجا شتگ ات ؛ پدا درکپت و هما پـٹ و گیاواناں په تر و گرد شت و هما اسپیت مود و بگی سرگیں مردکی دیست .

        پولی کت : - تو منا بگوئش که پرچا تئی مود اسپیت و تئی ریش سیاه انت ؟

        آ پسو دات : - من اے جست ءِ پسو ءَ ترا گوئشت نکناں .

        - من بادشاه ءِ وزیراں . تو اگں منی پسّو ءَ مد یئے من ترا بندیگجاه ءَ بند کناں ، بلے اگں منا بگوئش ئے  من ترا هزار تنگهیں ( تلاه - سُهر ءِ) زر ءَ دیاں .

        هیرانی مرد پسو دات :

        - منا نود ونه تنگه ءِ زر بدئے بس انت !

        - اے چونیں هوڈیں مردکے که اینچو باز کم زری  لوٹ اِت. - بادشاه ءِ وزیر وتی دل ءَ گوئشت و رندا شت بادشاه ءِ کرّ ءَ .

        وهدے که بادشاه ءِ جُست ءِ پسوی دات ، بادشاه سرپد بیت که چے بیتگ و پرماتی که هما دمان ، آ هیرانی مردک ءَ بیار انت .

        - چون تو دل کت که منی هبر ءَ دو بکن ئے ؟ - بادشاه آئی ءِ سرا گوانک جت .

       - نه واجه ! نه هچ دابے من شمئی هبر ءَ دو نکتگ . من پوره شمئی هبر ءِ برابر ءَ کتگ ! - مرد ءَ بادشاه ءِ جواب ءَ دات .

       - چون گــُـڑا ؟ - بادشاه هیرانی ءَ پول کت .

       - من وزیر ءَ هچی نگوئشت تاں وهدے که من نود و نه گــَـشت بادشاه ءِ دیم و شبین ءَ که اے تنگهاں نکش ات ندیست .

       بادشاه ءَ اے جواب همینچو وَش و دوست بوت که بادشاه هیرانی مرد ءَ وتی هزانگدار کت و هیرانی مرد چه بادشاه ءِ نزیکیں مردماں بوت .

        رند چه چیزے وهد ، بادشاه لوٹت که وتی زرانی هساب و هزانگدار ءِ کار ءِ باره ءَ بزانت . دیستی که زری گیش و سک گیش بیتگ انت . باز وَش بوت و وتی هزانگداری جوانیں دادے دات . 

       بلے همینچو که بادشاه چه هزانگدار ءِ کار و کرد گیشتر وَش بیتگ ات همینچو وزیر ءَ چه هزانگدار گیشتر بد یهتگ ات .

       شپ و روچ وزیر پگر کنان ات که چوں هزانگدار ءَ چه اوداں گار بکنت . یگبرے شاهی گوئشت که تئی هزانگدار تئی زراں چه تئی هزانگ دزی کناں و وتی لوگ ءَ براں و چیردیان انت .

        بادشاه که اے گپ اشکت ، گوں وتی گلاماں هزانگدار ءِ لوگ ءَ شت .

        بادشاه ءِ گلام و مردمان هزانگدار ءِ سرجمیں لوگ ءِ جهل و برز و ٹنگاں چارست ، بلے هچ چیز اش ودی نکت . ماں همے وهد وزیر بندیں کوٹی یے ودی کت .

        - اَه هان ،  هـَــــؤؤؤ ! - وزیر گوانک جت ؛ - چیر و اندریں کوٹی یے !

         بادشاه پرمات که کوٹی ءِ دروازگ اش پَچ کت . کوٹی پهک هالیگ و هورک ات هچ چی اوداں نیست ات .

        بادشاه پهک هیران ات و پولی کت :

        - چے یے اے چیر اندریں کوٹی ؟

        - میریں بادشاه من سک شمئی منتواراں که شما منی سرا اهتبار کتگ و پر من اش نیکی کتگ ، من اش کار داتگ و وتی کِرّ ءَ داشتگ ، شمئی سرجمیں دادانی گون ءَ ؛ بلے من پیکه وتی نیزگاری ءَ مه شموشاں . په همے هاترا من هر روچ اے هورکیں کوٹی ءِ تها آتکگاں تاں وتی پیشی نیزگاری ءَ کدیں بهیال مه کناں که من هما پیشی و ادناییں مردماں که مودی اسپیت و ریشی سیاه انت که یکروچے شما ماں گیاواناں دیستگ .

      - من زانت که تو زانتکاریں مردمے ئے ، - بادشاه پسو دات ؛ - بلے من هنوں سرپد بوتاں تو سک شهزانت و هُژیاریں مردمے ئے .

       گڑاں بادشاه وتی وزیر گلینت و هزانگداری ، وتی وزیر کت .

                                             ٭٭٭٭٭